BQO-da tyıym salynǵan taýarlardy zańsyz áketýdiń 219 deregi tirkeldi
ORAL. KAZINFORM – Batys Qazaqstan oblysynda taýarlardyń kóleńkeli aınalymymen kúreske erekshe nazar aýdarylyp keledi.
BQO boıynsha memlekettik kirister departamenti basshysynyń orynbasary Ermek Alǵazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 2025 jyly tyıym salynǵan taýarlardy zańsyz áketýdiń 219 dereginiń joly kesildi.
Onyń sózine qaraǵanda, zańsyz aınalymnan 67,6 myń lıtr alkogol ónimi, 1,5 mln qorap temeki jáne 2 183 tonna munaı ónimderi tárkilendi. Keıbir pozıtsııalar boıynsha tárkileý kólemi 2024 jylmen salystyrǵanda birneshe esege artty.
- Bul sharalar bıýdjet kirisin arttyrýmen qatar adal kásipkerlerdi qorǵaýǵa jáne ekonomıkalyq qaýipsizdikti qamtamasyz etýge baǵyttalǵan. Salyqtyq tekserýler nátıjesinde 11,8 mlrd teńge qosymsha esepteldi. Bir tekserýge shaqqandaǵy ortasha qosymsha esepteý kólemi artty, bul táýekelderdi irikteý men taldaý sapasynyń jaqsarǵanyn kórsetedi, - dedi E.Alǵazıev.
Onyń aıtýynsha, bereshekpen jumys ta turaqty júrgizildi. 2026 jylǵy 1 qańtardaǵy málimet boıynsha bereshek 4,9 mlrd teńge boldy. Bul ósimniń bir bóligi qosymsha esepteýlermen baılanysty. Sonymen qatar jyl ishinde qabyldanǵan sharalardyń arqasynda 6 mlrd teńgege bereshek azaıtyldy. Inkassalyq ókimder, múlikti satý, ońaltý jáne bankrottyq rásimderi, bólip tóleý tetikteri qoldanyldy.
Sol sekildi memlekettik bıýdjet pen Ulttyq qor boıynsha artyq tólem 7,3 mlrd teńgege qysqardy. Bul esep aıyrysýdyń naqtylanǵanyn jáne bıznestiń «qatyp turǵan» qarajatynyń azaıǵanyn bildiredi.
- Halyqpen ózara baılanysqa erekshe kóńil bólindi. Óńirde 776 myńnan astam salyq tóleýshi tirkelgen. Jyl ishinde 6 myńnan astam túsindirý is-sharasy ótkizildi. Baılanys ortalyǵy 11 891 ótinish qabyldap, azamattardyń qanaǵattaný deńgeıi 94 paıyz boldy. Bizdiń maqsat – tek baqylaý emes, sonymen qatar servıstik baǵytty kúsheıtý, talaptardyń ashyqtyǵyn qamtamasyz etý jáne qoǵam senimin arttyrý, - dep qosty E.Alǵazıev.
Departament málimetine sáıkes 2025 jyldyń qorytyndysy boıynsha memlekettik bıýdjetke 562,7 mlrd teńge kóleminde salyqtyq túsimder qamtamasyz etildi. 2024 jylmen salystyrǵanda ósim 5,2 paıyz nemese 28,1 mlrd teńgege jetti. Bul – syrtqy ekonomıkalyq ahýaldyń kúrdeliligine qaramastan, qol jetkizilgen oń nátıje. Jergilikti bıýdjet boıynsha jospar 101 paıyzǵa oryndalyp, 215,7 mlrd teńgeniń ornyna 217,9 mlrd teńge tústi. Aldyńǵy jylmen salystyrǵanda, ósim – 20,1 mlrd teńge.
Eske sala keteıik, budan buryn Batys Qazaqstanda Reseımen shekarada júk kólikteri kepteliste turǵanyn jazǵan edik.