BQO-da teri óńdeıtin zaýyt iske qosyldy
ORAL. KAZINFORM – Batys Qazaqstan oblysy Jánibek aýdanynda «EcoClub» JShS-nyń óndiristik nysany iske qosyldy.
Onyń ashylý rásimine aımaq basshysy Narıman Tóreǵalıev qatysty. Jańa zaýytta iri qara men jylqy terisinen joǵary aqýyzdy, sapaly proteındi jemdik qospa óndiriledi.
Bul bastama óńirlik agroónerkásip keshenin damytýǵa, mal sharýashylyǵyndaǵy ónimdilikti arttyrýǵa, sondaı-aq ımportqa táýeldilikti azaıtýǵa múmkindik beredi. Seriktestik basshysy Baýyrjan Sabanov tyń jobany júzege asyrý úshin «Aqjaıyq» áleýmettik kásipkerlik korporatsııasy arqyly jeńildetilgen nesıe alǵan.
Jobanyń jalpy quny 630 mıllıon teńgeni quraıdy. Kásiporyn tolyq qýatyna kóshkende aıyna 200 tonnaǵa deıin daıyn ónim óndire alady. Óndiriske qoldanylatyn zamanaýı jabdyqtar Soltústik Qazaqstan oblysynan jetkizilgen. Olar tehnologııalyq tıimdilikti qamtamasyz etip qana qoımaı, ónim sapasynyń joǵary bolýyna jol ashady. Óndiristi avtomattandyrý eńbek ónimdiligin arttyrýǵa jáne kásiporynnyń básekege qabilettiligin kúsheıtýge múmkindik beredi.
Aımaq basshysy byltyr oblystyń óńdeý ónerkásibinde ónim kólemi 112,2 paıyzǵa ulǵaıyp, 379,7 mlrd teńge bolǵanynatap ótti.
— Bul kórsetkish — jaı ǵana statıstıka emes, halyqtyń ómir súrý sapasyn arttyrýǵa tikeleı áser etetin mańyzdy faktor. Birinshiden, óndiris kóleminiń ulǵaıýy salyq túsimderin arttyrady. Ekinshiden, turaqty jumys oryndary kóbeıedi. Úshinshiden, ekonomıkalyq ósim aýyldardy ınfraqurylymmen qamtýǵa múmkindik beredi. Jańa kásiporyn osy senim údesinen shyǵady dep oılaımyz. Zaýyt ujymyna óndiristik ósý, tolaıym tabys tileımin, — dedi Narıman Tóreǵalıev.
Aıta keteıik, byltyr ırandyq ınvestorlarmen júrgizilgen kelissózderdiń nátıjesinde Oralda úsh jyldan beri jumysy turalap qalǵan teri óńdeý zaýyty qaıta iske qosyldy. Jergilikti atqarýshy organ bıznes-qaýymdastyqpen birlese otyryp, bul baǵyttaǵy jumystardy júıeli túrde jalǵastyrady.