BQO-da Teńiz ken ornynan kelgen taǵy bir adamnan koronavırýs anyqtaldy
ORAL. QazAqparat – Batys Qazaqstan oblysynda Teńiz ken ornynan kelgen taǵy bir azamattan koronavırýs anyqtaldy, dep habarlaıdy QazAqparat tilshisi.
8 mamyr kúngi sońǵy derekterge sáıkes, Qazaqstanda koronavırýsty juqtyrýdyń jańadan 40 jaǵdaıy tirkeldi. Onyń ishinde BQO-da 1 naýqas anyqtaldy.
BQO ákimdiginen málim etkendeı, ol – Atyraý oblysyndaǵy Teńiz ken ornynda jumys isteıtin Oral qalasynyń 52 jastaǵy turǵyny.
Kórshi aımaqtan kelýine baılanysty karantındik statsıonarǵa jatqyzylyp, zerthanalyq synama alynǵan.
«PTR-dıagnostıkalyq zertteý qorytyndysymen COVID-19 dıagnozy naqtylanyp, ol oblystyq juqpaly aýrýlar aýrýhanasyna ornalastyryldy. Naýqaspen baılanysta bolǵandar anyqtalyp, barlyǵy medıtsınalyq baqylaýǵa alyndy. Aýrý oshaǵynda dezınfektsııalyq jumystar júrgizildi», - delingen aqparatta.
Osylaısha BQO-da indetke shaldyqqandardyń jalpy sany 218-ge jetip, sonyń 72-si jazylyp shyqty.
Eske sala keteıik, budan buryn BQO-ǵa Teńiz ken ornynan kelgen 1700-den astam adamnyń karantınge jatqyzylǵanyn jazǵan bolatynbyz.
Teńiz kenishinde karantın jarııalanýyna baılanysty 20 sáýirden beri sonda jumys isteıtin adamdar óńirlerge qaıtarylýda.
Sodan beri Teńizden BQO-ǵa kelgender arasynan osymen 21 adamnan koronavırýs tabyldy.
