BQO-da Teńiz ken ornynan kelgen myńnan astam adam úıden baqylanýda
ORAL. QazAqparat – Batys Qazaqstan oblysynda Teńiz ken ornynan kelgen myńnan astam adam úıden baqylanýda, dep habarlaıdy QazAqparat tilshisi.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, Atyraý oblysyndaǵy Teńiz ken ornynan 20 sáýirden beri óńir turǵyndary qaıtarylýda.
Sodan beri 2 myńdaı adam keldi. Olar sol boıda Aqjaıyq aýdany men Oral qalasyndaǵy karantındik statsıonarǵa jatqyzylyp, zerthanalyq synama alyndy.
Solardyń ishinde kúni búginge deıin 43 adamnyń koronavırýs juqtyrǵany anyqtaldy. Qazirgi kezde Teńiz ken ornynan kelgen myńnan astam adam úı karantıninde jatyr.
Batys Qazaqstan oblysynda koronavırýspen barlyǵy 252 adam aýyrsa, sonyń 203-i – shetten, negizinen Reseıden kelgender. 49-y – buryn koronavırýspen juqtyrǵan naýqastarmen qarym-qatynasta bolǵandar, sonyń ishinde 41-i – medıtsına qyzmetkerleri.
Bir atap ótetin jaıt, kún saıyn jazylyp shyqqandar sany ósip, 96-ǵa jetti.
«Oblysta indetke qarsy kúres jumystary jalǵasýda. Oblys turǵyndarynan karantındik shekteý sharalaryn saqtaýdy ótinemiz», dedi N.Mustaev.
Eske sala keteıik, budan buryn BQO-da koronavırýstan emdelgen ózge óńir turǵyndarynyń elderine qaıtyp jatqanyn, koronavırýs juqtyrǵan sońǵy bes naýqastyń Reseıden kelgenin jazǵan bolatynbyz.
