BQO-da Teńiz ken ornynan kelgen 1700-den astam adam karantınde jatyr
ORAL. QazAqparat – Batys Qazaqstan oblysynda sońǵy kezde Teńiz ken ornynan kelgender arasynda koronavırýs juqtyrǵandar kóbeıip otyr, dep habarlaıdy QazAqparat tilshisi.
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, Atyraý oblysyndaǵy Teńiz ken ornynda karantın jarııalanýyna baılanysty 20 sáýirden bastap sonda vahtalyq ádispen jumys jasaıtyn adamdar óńirlerge qaıtarylýda.
Sodan beri Batys Qazaqstan oblysyna Teńiz ken ornynan 1700-den astam adam keldi. Olardyń bári Atyraý oblysymen shektesetin Aqjaıyq aýdanyndaǵy blokposttan ótkennen keıin karantındik statsıonarlarǵa jatqyzyldy. Solardyń ishinde kúni búginge deıin 20 adamnan koronavırýs anyqtaldy. Qalǵandary úı karantıninde baqylanýda.
Jalpy, óńirde koronavırýs juqtyrǵan 217 adam tirkelse, sonyń 152-si – Reseıden kelgender. Olardyń deni – Qazaqstan, sonyń ishinde oblys azamattary. Óńirde turatyn bir áıel Germanııadan kelgen. Sondaı-aq, júk tasymalymen aınalysatyn Ózbekstan, Tájikstan jáne Qyrǵyzstan azamattary bar.
Sonymen qatar 42 naýqas – buryn koronavırýs juqtyrǵan adamdarmen qarym-qatynasta bolǵandar, munyń 37-si – medıtsına qyzmetkerleri.
Óńirde osy kezge deıin 65 adam emdelip shyqty.
«Іndetke qarsy sharalar odan ári jalǵasýda. Barlyq oblys turǵyndaryn karantındik shekteý sharalaryn, jeke gıgıenalyq talaptardy saqtaýǵa shaqyramyz», dedi N.Mustaev.
Eske sala keteıik, budan buryn BQO-da koronavırýs juqtyrǵan sońǵy eki naýqastyń da Teńiz ken ornynan kelgenin, taǵy alty adamnyń emdelip shyqqanyn jazǵan bolatynbyz.
