BQO-da Teńiz ken orny men Reseıden kelgen 10 adamnan koronavırýs anyqtaldy
ORAL. QazAqparat – Batys Qazaqstan oblysynda sońǵy koronavırýs juqtyrǵan 22 adamnyń 10-y Teńiz ken orny men Reseıden kelgen, dep habarlaıdy QazAqparat tilshisi.
BQO ákimdigi málim etkenindeı, sonyń ishinde jeteýi – Teńiz ken ornynan kelgen óńir turǵyndary.
Kórshiles Atyraý oblysynan kelýine baılanysty karantındik statsıonarǵa jatqyzylyp, zerthanalyq synama alynǵan.
Taǵy úsh adam – Reseıde jumys isteıtin 1990, 1986 jáne 1967 jylǵy azamattar. Samara oblysymen shektesetin «Syrym» avtoótkelinen ótken kezde densaýlyqtaryna shaǵymy bolmaǵanmen, jedel járdemmen karantındik statsıonarǵa jetkizilgen.
Sondaı-aq 22 adamnyń 12-si – buryn koronavırýspen juqtyrǵan naýqastarmen baılanysta bolǵan. Sonyń ishinde beseýi – medıtsına qyzmetkerleri.
Barlyq 22 adam da oblystyq juqpaly aýrýlar aýrýhanasyna ornalastyrylyp, olarmen qarym-qatynasta bolǵandar medıtsınalyq baqylaýǵa alyndy.
Aýrý oshaqtarynda dezınfektsııalyq jumystar júrgizildi.
Óńirde indetke qarsy sharalar jalǵasýda.
Osylaısha, Batys Qazaqstanda aýyrǵandar sany 310-ǵa jetip, sonyń 137-si saýyǵyp shyqty.
Eske sala keteıik, budan buryn BQO-da Reseıden kelgen túrkistandyq stýdentten koronavırýs tabylǵanyn jazǵan bolatynbyz.
