BQO-da tenderdi jeńip alǵan depýtattyń kompanııasy jol salmaı otyr
ORAL. KAZINFORM — Batys Qazaqstanda oblystyq mańyzy bar Chapaev-Jańaqala-Saıqyn joly syn kótermeıdi. Osyǵan baılanysty Kazinform tilshisi máseleni saralap kórdi.
Qarjy bólingenimen tóselgen trassa joq
Májilis depýtaty Nartaı Sársenǵalıevtiń BQO-ǵa sapary kezinde málim etkenindeı, Aqjaıyq pen Jańaqala aýdandaryn jalǵaıtyn tasjol shurq-tesik. Keı tustarda tasjoldy tastap, jıekpen júrýge týra keledi.
Onyń sózine qaraǵanda, Chapaev-Jańaqala jolynyń eń nashar 40 shaqyrymyn jóndeýge 2 mlrd 892 mln teńge qaralǵan.
— Merdiger kompanııaǵa 2024 jyly atalǵan qarajattyń 478 mln teńgesi berilgen. 2025 jylǵa taǵy 500 mln teńge bólingen. Biraq tóselgen trassa joq. Jurtshylyq ta, aýdan basshylyǵy da san soǵyp otyr. Tapsyrys berýshi BQO jolaýshylar kóligi jáne avtomobıl joldary basqarmasynyń basshysymen sóılestim. Jol qurylysy bastalatyn bolyp sheshildi, — deıdi Nartaı Aralbaıuly.
Májilis depýtatynyń málimdeýinshe, oblys ortalyǵynan eń shalǵaıda ornalasqan Bókeı ordasy aýdany Bısen aýylynan Jańaqalaǵa qaraı salynýy tıis jol qurylysy da toqtap tur.
— Bısen aýylynan bastalyp, Jańaqala aýdanynyń shekarasyna deıin jetýi tıis trassanyń uzyndyǵy — 120 shaqyrym. Alǵashqy kezeńi úshin 30 shaqyrymyna 9 mlrd 465 mln 307,6 myń teńge bólindi. Alaıda merdiger mekeme «SMÝ-5» JShS byltyr berilgen qarjyny tolyq ıgere almady. Sonymen qatar ózimen birge jumys istegen kompanııalarǵa, qarapaıym jumysshylarǵa belsheden qaryz. Bul másele de baqylaýymyzda bolady, — dedi N.Sársenǵalıev.
Bısen aýylynyń turǵyny Raýshan Muhambetova aspaz retinde jumys istep júrgenin aıtady.
— Qazirgi kezde Bısennen Jańaqalaǵa qaraı shyǵatyn jol qurylysynyń toqtap qalǵany ras. Ótken jyly eki aıdyń eńbekaqysyn ala almadyq. Bıyl mamyr aıynyń jalaqysy qolǵa tıdi. Biraq KamAZ júk kóliginiń júrgizýshilerine berilgen joq. Kúni búgin azyq-túlik alatyn qarjy joq dep otyr. Sol sebepti jumysshylar men júrgizýshiler jan-jaqqa tarap jatyr, — dedi R.Muhambetova.
BQO máslıhat depýtaty basqaratyn kompanııaǵa 8,3 mlrd teńge kóleminde 11 tender berilgen
BQO qoǵamdyq keńesiniń múshesi, zańger Baýyrjan Ahmetjannyń naqtylaýynsha, Chapaev-Jańaqala jolynyń qurylysyna jaýapty merdiger «Anýsh Qurylys» JShS basshysy — oblystyq máslıhattyń depýtaty Ogannes Mınasıan.
Goszakup.gov.kz portalynan alynǵan málimetke sáıkes ótken jyly 4 naýryzda Chapaev-Jańaqala-Saıqyn (tańdamaly 40 km) jolyn ortasha jóndeýge BQO jolaýshylar kóligi jáne avtomobıl joldary basqarmasy men «Anýsh Qurylys» JShS arasynda kelisimshart jasalǵan.
Quny — 2 mlrd 892 mln 285,468 myń teńge. Merzimi — 9 aı.
— Ótken jyldyń 19 naýryzynda avans esebinde 478 mln teńge tólengenimen, byltyr tek 2 km asfalt salynǵan. Bıyl 20 qańtarda atalǵan basqarma basshysy Marat Qýanshalıev pen Ogannes Mınasıan qosymsha kelisimshartqa qol qoıǵan. Máni men quny solaı qalǵan, tek merzimi bıylǵy 31 jeltoqsanǵa deıin ózgerdi. Alaıda sodan beri merdiger óz mindetterin oryndamaı otyr. Dál qazir jolda tehnıka da, jumysshy da joq, — deıdi B.Ahmetjan.
Onyń málimdeýinshe, tehnıkalyq qadaǵalaýshy — «KýstanaıSpetsStroı» JShS (dırektory Abaıhan Sadyq). Bul kelisimshart quny — 66,3 mln teńge, onyń 10,5 mıllıonyn alǵan. Nysanda olar da joq.
Atalmysh portal málimetine sáıkes «Anýsh Qurylys» kompanııasy bıyl oblys boıynsha 11 tender alǵan.
Oral qalasy boıynsha:
- Joldardy aǵymdaǵy jóndeý — 699 mln teńge.
- Sondaı-aq «Qurylysshy» shaǵynaýdany jolyn ortasha jóndeý — 661 mln teńge.
- Vetelkı aýylyna kirme joldy kúrdeli jóndeý — 2,5 mlrd teńge.
- 4-shaǵynaýdan jolyn ortasha jóndeý — 330,6 mln teńge.
- Komıntern aýylynda Belıaev kóshesin qaıta qurylymdaý — 154,7 mln teńge.
- Skorobogatov, Isaev, Jeńis kóshesin kúrdeli jóndeý — 90,8 mln teńge.
Báıterek aýdany boıynsha:
- Qarajar, Polıvnoe aýylyna kirme joldy kúrdeli jóndeý — 799 mln teńge.
- Jalyn, Mırnoe aýylyna kirme joldy kúrdeli jóndeý — 757 mln teńge.
Shyńǵyrlaý aýdany boıynsha:
- Shyńǵyrlaý-Aqjar-Segizsaı jolyn kúrdeli jóndeý — 976,4 mln teńge.
Syrym aýdany boıynsha:
- Qosoba aýylyna (14-29 km) kireberis joldy ortasha jóndeý — 1 mlrd teńge.
- Buldyrty aýylynyń 6 kóshesin kúrdeli jóndeý — 353,6 mln teńge.
— Bıyldyń ózinde kompanııa 11 kelisimshart boıynsha shamamen 8,3 mlrd teńgeniń jumysyn alǵan. Bes jerde ornalasqan jıyrmadan astam jol ýchaskelerine úlgere me? — deıdi BQO qoǵamdyq keńesiniń múshesi B.Ahmetjan.
11,5 mln teńge turaqsyzdyq aıyby óndirildi
BQO jolaýshylar kóligi jáne avtomobıl joldary basqarmasynyń basshysy Marat Qýanshalıev Chapaev-Jańaqala-Saıqyn (0-104 km) avtomobıl jolyn ortasha jóndeý (tańdamaly 40 km) boıynsha bas merdiger «Anýsh Qurylys» JShS, tehnıkalyq qadaǵalaýshy «KýstanaıSpetsStroı» JShS ekendigin rastady.
Kelisimshartqa sáıkes atalmysh joldyń eń nashar ýchaskelerin qamtý kózdelgen.
Ótken jyly 1 mlrd 596 myń teńge bólinip, sonyń 478,8 mln teńgesi ıgerildi. Bul qarajat jol-qurylys materıaldaryn daıyndaý úshin tólendi.
— 2024 jyly uzyndyǵy 5,7 km asfaltbeton jabyny tóseldi. Áıtse de «Jol aktıvteriniń ulttyq sapa ortalyǵy» RMK-nyń saraptama qorytyndysyna sáıkes bul jumystar qabyldanǵan joq. Ótken jyly jumys kestesinen keshigýine baılanysty basqarma tarapynan sotqa talap aryz joldandy. Batys Qazaqstan oblysy mamandandyrylǵan aýdanaralyq ekonomıkalyq sotynyń 2025 jylǵy 11 aqpandaǵy sheshimi negizinde «Anýsh Qurylys» JShS-nen memleket kirisine 11 mln 561,440 myń teńge mólsherinde turaqsyzdyq aıyby óndirildi, — deıdi basqarma basshysy.
Onyń usynǵan málimeti boıynsha 2025 jyly atalmysh nysandaǵy jumysty jalǵastyrý úshin 500 mln teńge bólindi. Jol qurylysyn aıaqtaý úshin qosymsha 1,9 mlrd teńge qajet. Osyǵan sáıkes oblystyq bıýdjettik komıssııaǵa ótinim joldanady.
Kúni búgin bul jolda jumys júrgizilip jatqan joq.
Kompanııa salyp jatqan taǵy bir joldan shý shyqty
«Anýsh Qurylys» JShS Oral qalasyndaǵy S. Esqalıev kóshesinde jol jóndeý jumysyn júrgizip jatyr.
Turǵyndardyń áleýmettik jelide habarlaǵanyndaı, 1 shilde kúni asfalt tóseý tehnologııasy óreskel buzylǵan. Jańbyr jaýǵannan keıin shalshyqtyń ústine asfalt tóselgen.
Osyǵan baılanysty Oral qalasy ákimdiginen alynǵan málimetke qaraǵanda, 1 shilde kúni merdiger uıym «Anýsh Qurylys» JShS S. Esqalıev kóshesiniń D. Nurpeıisova kóshesimen qıylysar tusynda asfalt tósegen kezde jańbyr jaýyp ketken.
— Buzýshylyqty joıý úshin Oral qalasy turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń mamandary baryp qarady. Jańbyr jaýyp ketkennen keıin jumystar toqtatyldy. Asfalt tóseý tehnıkasyndaǵy asfalt qospasy jol qabatyna túsirildi. Sebebi ony basqalaı tásilmen túsirýdiń tehnıkalyq múmkindigi bolǵan joq. Keıin bul qospa samosvalǵa tıelip, joıylýǵa áketildi, munyń beınejazbasy bar. «Jol aktıvteriniń ulttyq sapa ortalyǵy» RMK BQO fılıalynyń oń qorytyndysy alynyp, sapa standartyna sáıkestigi rastalǵannan keıin ǵana oryndalǵan jumys aktisine qol qoıylyp, jol ýchaskesi qabyldanady, — delingen resmı jaýapta.
«Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirov atalǵan jol ýchaskesinen kern alynyp, sapasy tekseriletinin jetkizdi.
Batys Qazaqstan oblysynda jol qurylysynda irkilister az emes. Buǵan jaýapty mekemeler atalǵan jol ýchaskelerin baqylaýdan tys qaldyrmaı, shuǵyl sharalar alýy qajet-aq.
Eske sala keteıik, budan buryn Batys Qazaqstanda shalǵaı aýyldarǵa asfalt jol qashan salynatynyn jazǵan edik.