BQO-da telemedıtsına kabıneti ashyldy
ORAL. KAZINFORM — Oral qalasynda alǵash ret «Jasandy ıntellekt negizindegi zııatkerlik telemedıtsına» atty Qazaqstan–Koreıa halyqaralyq sımpozıýmy ótti.
Aýqymdy sharaǵa Batys Qazaqstan oblysynyń ákimi Narıman Tóreǵalıev, Koreıa Respýblıkasynyń Katolıktik Kvandong ýnıversıteti janyndaǵy «Áýlıe Marııa» halyqaralyq klınıkasynyń prezıdenti Ko Dong Hen bastaǵan delegatsııa jáne óńir dárigerleri qatysty.
Halyqaralyq sımpozıým aıasynda oblystyq kópbeıindi aýrýhanada jańa telemedıtsına bólmesi saltanatty túrde ashyldy. Bul joba — aımaq basshysynyń 2025 jylǵy qarasha aıynda Ońtústik Koreıaǵa jasaǵan jumys sapary kezinde bekitilgen mańyzdy memorandýmdardyń naqty nátıjesi. Ekijaqty kelisim aıasynda bıyl nevrologııa jáne neırohırýrgııa salasyndaǵy oraldyq 10 maman «Áýlıe Marııa» klınıkasynda taǵlymdamadan ótti.
Oblys ákimi Narıman Tóreǵalıev qashyqtan medıtsınalyq qyzmetti damytý jónindegi Prezıdent tapsyrmalarynyń óńirde júıeli oryndalyp jatqanyn atap ótti.
— Memleket basshysy Qasym-Jomart Kemeluly Toqaevtyń Jarlyǵymen bekitilgen Ulttyq damý josparynda aıqyndalǵan baǵdarly kórsetkishtiń biri — 2029 jylǵa deıin ortasha ómir súrý uzaqtyǵyn 77 jasqa deıin jetkizý. Osy maqsat-mindetterdi oryndaý jolynda júıeli jospar bar. Búgingi halyqaralyq sımpozıým men densaýlyq saqtaý júıesin jetildirýge baǵyttalǵan kelisimderdiń iske asýy jergilikti mamandardyń biliktiligin arttyryp, jańa jetistikterge jol ashady. Ońtústik koreıalyq áriptestermen ornatylǵan tıimdi baılanys barlyq tarap úshin nátıjeli bolmaq, — dedi aımaq basshysy.
Óz kezeginde klınıka prezıdenti Ko Dong Hen da birlesken jobalardy jan-jaqty damytýǵa daıyn ekenin jetkizdi. Halyqaralyq is-sharada sheteldik mamandar jasandy ıntellekt kómegimen aýrýdy erte anyqtaý, telemedıtsınadaǵy zııatkerlik sheshimder jáne tsıfrlyq derekter qaýipsizdigi boıynsha ozyq tájirıbelerimen bólisti.
