BQO-da tekserilgen ónimderdiń 25 paıyzdan astamy talapqa saı kelmedi
ORAL. KAZINFORM — Batys Qazaqstan oblysynda bıylǵy birinshi toqsanda ónimderden 133 synama alynyp, laboratorııalyq zertteýler júrgizildi.
BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń málim etkenindeı, bulardyń 78-i nemese 76,3 paıyzy – taǵam ónimderi, 55-i (41,3 paıyzy) – tamaq emes ónimder.
Onyń sózine qaraǵanda, «Ulttyq saraptama ortalyǵy» RMK oblystyq fılıaly júrgizgen saraptamalar nátıjesi boıynsha 53 synama nemese 25,7 paıyzy tehnıkalyq reglamentter talaptaryna saı bolmaı shyqty. Basym kópshiligi tańbalanýy boıynsha synnan ótken joq. Sondaı-aq fızıkalyq-hımııalyq kórsetkishi boıynsha 1 synama tehnıkalyq reglamentke sáıkes kelgen joq.
- Anyqtalǵan kemshilikterge sáıkes belgilengen talaptarǵa saı kelmegen ónimder boıynsha sharalar qabyldandy. Atap aıtqanda, aýmaqtyq basqarmalar tarapynan 25 saýda nysanyna ónimdi keri qaıtaryp alý túrinde jedel den qoıý sharalaryn qoldaný týraly qaýlylar berilip, onyń oryndalýy qadaǵalandy, - dedi D.Jańabergenova.
Onyń aıtýynsha taǵam qaýipsizdigin qamtamasyz etý baǵytynda memlekettik tirkeýden ótpegen bıologııalyq belsendi qospalardy anyqtaý úshin monıtorıngileý jumysy turaqty júrgiziledi.
Qazaqstan aýmaǵynda satylyp jatqan barlyq bıoqospalardyń qaýipsizdigin qamtamasyz etý ónimderiniń memlekettik tirkelgeni týraly kýáligi bolýy tıis.
Sonymen qatar aýyz sý sapasy da turaqty baqylaýda.
- Oblys boıynsha sanıtarııalyq-hımııalyq kórsetkishterge 117 sý synamasy alynyp, sonyń 6,1 paıyzy talapqa saı bolmady. Sol sekildi mıkrobıologııalyq kórsetkishterge alynǵan 1 090 synamanyń 2,1 paıyzy sáıkes kelmedi. Sanıtarııalyq-hımııalyq kórsetkishter boıynsha sáıkessizdik kóbine qurǵaq qaldyqqa, hlorıdke qatysty boldy. Anyqtalǵan kemshilikter boıynsha tıisti mekemelerge usynystar berilip, ortalyqtandyrylǵan sýmen jabdyqtaý nysandarynda jýyp-shaıý, dezınfektsııalaý jumystary júrgizildi, - dedi departament basshysy.
Eske sala keteıik, budan buryn Batys Qazaqstanda tumaýmen aýyrǵandar sany 7,7 esege ósip ketkenin jazǵan bolatynbyz.