BQO-da tazartý qondyrǵysy janynda káriz sýy dalaǵa aǵyp jatyr
ORAL. KAZINFORM — Batys Qazaqstan oblysy Báıterek aýdany Darııan aýylynda kárizdik tazartý qondyrǵysy janynda sasyq sýdyń dalaǵa aǵyp jatqany jóninde áleýmettik jelide beınejazba jarııalandy.
Qoǵam belsendisi Almagúl Iqsanovanyń Instagram áleýmettik jelisinde málim etkenindeı, tazartý qondyrǵysyna quıylǵan las sý dalaǵa aǵyp jatyr.
— Bul jerden ótý múmkin emes. Sasyq ıis birneshe shaqyrym qashyqtyqtan seziledi. Tazartylmaǵan káriz sýy shlangimen dalaǵa aǵýda. Sonda kárizdik tazartý qondyrǵysy ne úshin kerek? Osy jaǵdaıdy baqylaýy tıis ekologııa departamenti qaıda qarap otyr? — deıdi A.Iqsanova.
Osy máselege oraı Kazinform tilshisiniń saýalyna jaýap bergen Báıterek aýdany ákimdiginen túsken málimetke qaraǵanda, Darııan aýyldyq okrýginde ornalasqan kárizdik tazartý qondyrǵysy qalypty jumys istep tur.
Sonymen qatar nysandy paıdalaný barysynda kárizdik tazartý qondyrǵysynyń naqty júktemesi jobada qarastyrylǵan kórsetkishten asyp túsetini anyqtaldy. Qondyrǵynyń jobalyq qýaty Darııan aýyldyq okrýgi boıynsha qyzmet etýge eseptelgen.
Ákimdik málimeti boıynsha qazirgi ýaqytta basqa aýyldardan, sonyń ishinde Rýbejın jáne Baıqonys aýyldyq okrýgterinen káriz sýyn qabyldaý kólemi ósip otyrǵany baıqalady. Sonyń nátıjesinde kárizdik tazartý qondyrǵysy qabyldaıtyn aǵyndy sýlar kólemi kóbeıgen.
Aǵyndy sýlardy tazartýda qondyrǵynyń ótkizý qabiletin arttyrý úshin qosymsha jóndeý jumystary júrgizilip jatyr.
— Qondyrǵynyń júktemesin retteý jáne onyń turaqty jumysyn qamtamasyz etý maqsatynda kúni búgin aǵyndy sýlar tasqynyn ýaqyt boıynsha belgileý úshin assenızatorlyq tehnıkalardy qabyldaý kestesin engizý máselesi qarastyrylýda. Jalpy, kárizdik tazartý qondyrǵysynda tehnologııalyq buzýshylyqtar anyqtalǵan joq. Biraq budan bylaı paıdalaný barysynda júktemeni ońtaılandyrý boıynsha sharalar qabyldaýdy qajet etedi, — delingen resmı jaýapta.
BQO ekologııa departamentiniń basshysy Murat Ermekqalıev atalmysh máselege qatysty taıaýda tekseris júrgiziletinin jetkizdi.
Eske sala keteıik, budan buryn BQO-da káriz sýy nelikten qoqys alańyna tógilip jatqany jóninde ákimdik jaýap bergenin jazǵan bolatynbyz.
