BQO-da Táýelsizdiktiń 25 jyldyǵyna oraı «Jaýqazyn - 2016» jobasy júzege asyrylýda (FOTO)
ORAL. QazAqparat - Búgin Batys Qazaqstan oblystyq tarıhı-ólketaný mýzeıinde Táýelsizdiktiń 25 jyldyǵyna oraı qolǵa alynǵan «Jaýqazyn - 2016» jobasy aıasynda Aqjaıyq aýdany balalar shyǵarmashylyǵy ortalyǵy sýretshileri men qolóner sheberleriniń «Uly eldiń ulanymyz» atty kórmesi ashyldy.
Murajaı qyzmetkerleriniń aıtýynsha, bul - tańdaýly týyndylaryn usynyp otyrǵan alǵashqy aýdan. Táýelsizdik toıyna oraı 25 jas daryndy anyqtaýdy maqsat etken jobaǵa barlyq aýdannan úmitkerler qatysyp, shara jeltoqsan aıynda qorytyndylanatyn bolady.
Kórmeniń ashylý rásimine qatysqan Aqjaıyq aýdany ákiminiń orynbasary Meńzıpa Jumatovanyń atap ótkenindeı, atalmysh joba el ishindegi talantty jastardy taýyp, eńbekterin elep, ynta-jigerlerin arttyrýǵa septesetini anyq.
Aqjaıyq aýdanynyń kórmesinde qazaq halqynyń ulttyq salt-dástúri men mádenıetine, táýelsiz eldiń bel-belesterine qatysty keskindeme, grafıka, músin, fotosýretter, zergerlik, sándik-qoldanbaly jáne aǵash, kıizden jasalǵan túrli buıymdar qoıylǵan. Kórme 8 sáýirge deıin jumys jasamaq. 
