BQO-da taýar baǵasyn asyryp satqan 140-tan astam kásipkerge aıyppul salyndy
ORAL. KAZINFORM – Batys Qazaqstan oblysynda jyl basynan beri Ákimshilik quqyq buzýshylyq týraly kodeksiniń 204-4-babyna sáıkes 141 kásipkerlik nysany jaýapkershilikke tartyldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, olardyń bárine de saýda ústemesin asyryp jibergeni úshin aıyppul salyndy.
Elmıra Nurqyzynyń sózine qaraǵanda, bıylǵy qańtar aıynda 31 pozıtsııaǵa deıin keńeıtilgen áleýmettik mańyzy bar azyq-túlik taýarlarynyń tizbesine sary maı (tuzdalmaǵan, maılylyǵy 72,5 paıyzdan 80 paıyzǵa deıin, toltyrǵyshtarsyz jáne ósimdik maılarynsyz) da engizilgen.
Onyń aıtýynsha, Zańǵa sáıkes ishki saýda sýbektileri áleýmettik mańyzy bar azyq-túlik taýarynyń qunyn óndirýshiniń bosatý nemese kóterme jetkizýshiniń satyp alý baǵasynan 15 paıyzdan asyrmaı belgileıdi. Bul talap qalanyń saýda jelilerine sharttyq qatynastar negizinde taýar jetkizetin bıznes sýbektilerine de qoldanylady.
Alaıda taýar jetkizýshilerdiń barlyǵy birdeı bul talapty saqtamaıdy. Aıtalyq, departament bir kompanııanyń saýda jelilerine atalǵan sary maıdy saýda ústemesiniń mólsherin asyra otyryp jetkizgenin anyqtady. Jetkizýshi saýda ústemesin 20-dan 30 paıyzǵa deıin asyryp jibergen.
- Osy derek boıynsha jospardan tys tekserý júrgizilip, sonyń nátıjesinde Ákimshilik quqyq buzýshylyq týraly kodeksiniń 204-4-baby boıynsha kásipker ákimshilik jaýapkershilikke tartylyp, oǵan aıyppul salyndy. Sondaı-aq kásipkerlik sýbektisine buzýshylyqtardy joıý týraly nusqama berildi, - dedi E.Qımatova.
Eske sala keteıik, budan buryn Oralda baspanasy órtengen turǵyn kompanııadan 13 mln astam teńge óndirgenin jazǵan edik.
