BQO-da tasqyn sý shaıyp ketken soń birneshe kólik joly jabyldy
BQO TJ departamentiniń jedel shtaby málim etkenindeı, Shyńǵyrlaý aýdanynda aýdandyq mańyzy bar Shyńǵyrlaý-Shoqtybaı jolynyń 8-shaqyrymyn erigen qar sýy shaıyp ketti. Shyńǵyrlaý-Taldysaı jolynyń 3-shaqyrymynda da osyndaı oqıǵa tirkeldi.
Sol sekildi 2 sáýir saǵat 16.30-da oblystyq mańyzy bar Bórli-Aqsaı-Jympıty avtojolyn (87-shaqyrymynda) sý basty. Qyzmet kórsetýshi uıymnyń kúshimen kezekshilik uıymdastyryldy.
Terekti aýdanynda jergilikti mańyzy bar Saryómir-Dýana jolyn da sý shaıdy.
Sonyń saldarynan atalmysh joldar barlyq kólik túrleri úshin jabyldy.
Sondaı-aq 2 sáýir kúni saǵat 17.00-de Terekti aýdany Dolınnyı aýyly tusynda respýblıkalyq mańyzy bar Podstepnyı-Fedorov-RF shekarasy jolynan sý asyp ketti. Aǵyn sýdy toqtatý úshin tıisti jumystar jasaldy. Jol qatynasynda irkilis bolǵan joq. Saǵat 23.25-te tasqyn sý tyıyldy.
Jánibek aýdanynda saǵat 19.00-de jergilikti mańyzy bar Jánibek-Talov jolynyń birneshe jerin tasqyn sý basty. Bul jolmen júk talǵamaıtyn kólikter júre alady.
Oblysta kúnniń kúrt jylynyp, qardyń erýine, sondaı-aq ózenderde sý deńgeıiniń kóterilýine baılanysty kúrdeli jaǵdaı qalypttasyp otyr.
Qazirgi kezde bes aýdanda kóktemgi sý tasqynyna qarsy jumystarǵa 267 adam (51 tehnıka, 6 júzý quraly, 13 motopompa) jumyldyryldy. BQO-nyń Tasqala aýdanyna Mańǵystaý oblysynan da kómek keldi.
Eske sala keteıik, budan buryn BQO-nyń taǵy bir aýdanynda tótenshe jaǵdaı jarııalanǵanyn, 170-ten astam turǵyn úıdi sý basqanyn jazǵan bolatynbyz.
