BQO-da tasqynnan japa shekken 7 myńnan astam adamnyń nesıesi keıinge shegerilmek
ORAL. KAZINFORM – Batys Qazaqstan oblysynda QR Qarjy naryǵyn retteý jáne damytý agenttigimen sý tasqynynan zardap shekken 7 myńnan astam adamnyń nesıe qaryzyn keıinge shegerý boıynsha sharalar qabyldanýda.
BQO ákiminiń orynbasary Tilepbergen Kaıýpovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 4 myńǵa jýyǵy — saıajaı turǵyndary.
Tilepbergen Ersaıulynyń sózine qaraǵanda, sý tasqynynan zardap shekkenderge nesıe boıynsha tólemder 1 sáýir men 30 maýsym aralyǵynda 3 aı merzimge keıinge qaldyrylady.
Sý tasqyny saldarynyń áserine baılanysty týyndaǵan tólemdi keshiktirgeni úshin aıyppul men ósimpul eseptelmeıdi.
«Oblysta sý tasqynynyń birinshi jáne ekinshi kezeńderiniń saldaryn qalpyna keltirý boıynsha jumystar bastaldy. Kúni búgin Oral qalasy, Qaratóbe, Syrym, Báıterek, Bórli jáne Terekti aýdandaryndaǵy turǵyndarǵa keltirilgen shyǵyndardy óteý boıynsha komıssııalar óz jumystaryn jalǵastyrýda. Múmkin bolatyn jerlerde, tehnıkalyq tekserýler júrgizilýde» dedi oblys ákiminiń orynbasary.
Onyń aıtýynsha, tótenshe jaǵdaı týyndaýy saldarynan 1 321 turǵyn úıge zııan keltirildi.
1 208 úı boıynsha tehnıkalyq tekseris júrgizilip, sonyń ishinde 420 turǵyn úı ári qaraı turýǵa jaramsyz dep tanyldy (Qaratóbe — 90, Syrym — 114, Terekti — 85, Báıterek — 7, Bórli — 124).
Atalǵan aýdandarda jaramsyz dep tanylǵan turǵyn úılerdi qalpyna keltirý boıynsha jumystar bastaldy. Atap aıtqanda, salynatyn jańa turǵyn úılerdiń jer ýchaskeleri anyqtalyp, eski oryndary buzylyp, jer jumystary júrgizilýde.
Sonymen qatar zardap shekkenderge 100 aılyq esep kórsetkish mólsherinde birjolǵy áleýmettik kómek (369,2 myń teńge) kórsetilýde. Kazirgi tańda 1 893 otbasy 688,3 mln teńgege áleýmettik kómek aldy.
Sý tasqyny saldarynan 2 342 bas mal shyǵynǵa ushyrady, sonyń ishinde 341-i — iri qara, 63-i — jylqy, 1 741-i — usaq mal, 116-sy — shoshqa jáne 81-i — úı qusy.
Bul baǵyttaǵy shyǵyndardy óteýge oblystyq bıýdjettiń rezervinen 187,5 mln teńge bólindi.
Kúni búgin 141 ótinish bildirýshige 126,9 mln teńge kóleminde 1 myń bas mal shyǵyny óteldi.
«Materıaldyq múlikti óteýdiń joǵarǵy shekti quny 150 AEK-ke deıin bolyp belgilendi (553,8 myń teńge). Materıaldyq múlikti óteý tıisti baǵalaý jumystary ótkizilgennen keıin júrgiziletin bolady. Bızneske kelgen shyǵyndardy anyqtaý arnaıy qurylǵan komıssııamen júrgizilýde. Oblys boıynsha 100 sýbekti (Báıterek — 24, Terekti — 37, Syrym — 7, Qaratóbe — 8, Bórli — 8, Oral qalasy — 16) zııanǵa qaldy» dedi T.Kaıýpov.
Eske sala keteıik, budan buryn Jaıyq ózenindegi sý deńgeıi Taıpaq aýyly tusynda 750 santımetrge jetkenin jazǵan bolatynbyz.
Batys Qazaqstanda sý basqan joldar qalaı qalpyna keltirilip jatyr.