BQO-da tasqynnan japa shekken 1 690 adamǵa 612 mln teńge materıaldyq kómek kórsetildi

ORAL. KAZINFORM – Batys Qazaqstan oblysynda sý tasqynynan zardap shekken turǵyndardan 8 658 ótinim tústi.

BQO prokýrorynyń birinshi orynbasary Dáýren Omarǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, kúni búginge deıin 1 690 adamǵa 612,6 mln teńge kóleminde materıaldyq kómek kórsetildi. 

Onyń sózine qaraǵanda, qalǵan ótinimder kezeń-kezeńmen sheshiledi. 

Oblys boıynsha 413 turǵyn úı qalpyna keltirilýge jatady. Sýǵa ketken nysandardyń kópshiligi tekserilip, olar boıynsha jobalaý josparlanýda.

Osydan keıin úılerdi salý jáne jóndeý bastalady. 

Tótenshe jaǵdaı saldarynan turǵyn úısiz qalǵan azamattarǵa turǵyn úı berý úshin quqyqtyq negizdi úkimet belgiledi.

Sonymen qatar tótenshe jaǵdaı saldarynan zardap shekkenderge keltirilgen zııandy (zalaldy) óteý qaǵıdalary aıqyndaldy.

«Oblys prokýratýrasy zardap shekkenderdiń máselelerin jedel sheshý úshin 17 sáýirden bastap Oral qalasynyń sý basý oryndarynda avtobýstar bazasynda 4 mobıldi qabyldaý bólmesin uıymdastyrdy. Oǵan ákimdikter men quqyq qorǵaý organdarynyń qyzmetkerleri qatysady. Búgingi tańda 25 baý-baqsha seriktestiginiń myńǵa jýyq turǵynyna quqyqtyq kómek kórsetildi. Sý basqan baý-baqsha seriktestikteriniń 15 azamatyna (múlikti qutqarý úshin qaıyq berý jáne eGov portaly arqyly zalaldy óteýge ótinim resimdeý) járdem berildi. Oral qalasynda evakýatsııalyq pýnktterde zalaldy óteýge ótinim berý erejesi boıynsha býkletter ornalastyrylǵan», dedi D.Omarǵalıev.

Oblys prokýrory birinshi orynbasarynyń aıtýynsha, quqyq qorǵaý organdarynyń kúshimen zardap shekkenderdiń múlkin saqtaý qamtamasyz etildi.

Qabyldanyp jatqan sharalarǵa qaramastan, keıbir jeke tulǵalar ruqsat etilmegen narazylyq aktsııalaryna shaqyryp, jalǵan aqparat taratady, sondaı-aq ulttyq negizde arandatýǵa barady.

Mundaı buzýshylyqtar úshin bas bostandyǵynan aıyrýǵa deıingi qylmystyq jaýapkershilik jáne aıyppul nemese qamaýǵa alý túrindegi jazamen ákimshilik jaýapkershilik kózdelgen. 

«Sý tasqyny kezeńinde atalǵan derekter boıynsha 7 adam ákimshilik jaýapkershilikke tartyldy. Sonyń ishinde bireýi qoǵamdyq orynda jeke tulǵalarǵa tıisken. Ekinshisi ultaralyq jáne áleýmettik alaýyzdyqty qozdyrǵan. 2 adam jalǵan aqparat taratqan. Taǵy úsheýi kólik quraldarynyń qozǵalysyn shektegen. Osyǵan oraı turǵyndarǵa barlyq problemalyq máselelerdi quqyqtyq negizde sheshý kerektigin eske salamyn. Bul úshin barlyq jaǵdaı jasalǵan jáne tek resmı kózderden alynǵan aqparatqa sený kerek», dedi D.Omarǵalıev.

Eske sala keteıik, budan buryn BQO-da mal shyǵyny boıynsha ótemaqy qalaı berilip jatqanyn jazǵan bolatynbyz.