BQO-da tasqyn kezinde sibir jarasy kómindilerinen qaýip joq — veterınarlar

ORAL. KAZINFORM — Batys Qazaqstan oblysynyń veterınarııa basqarmasy aýdandardaǵy sý basqan jerlerde ornalasqan sibir jarasy kómindileri jaıynda osyǵan deıin taralyp ketken aqparatqa túsinikteme berdi.

Basqarma basshysynyń orynbasary Abzal Bralıevtiń aıtýynsha, búgingi tańda aýdandarda veterınarlyq qyzmet jergilikti atqarýshy organdarmen birlesip, ólgen úı janýarlarynyń kózin joıý jumysyn bastaǵan. 

— Basqarmanyń bólim basshysynyń budan buryn bergen aqparatyna túsinik bergim keldi. Búgingi tańda óńirde 13 emes, úsh kómindi sý astynda qaldy. Al aýrý qozdyrǵyshtary erigen sýmen taralady degen sóz shyndyqqa janaspaıdy. Óıtkeni kómindilerdiń barlyǵy veterınarııalyq-sanıtarııalyq talaptarǵa saı: betondalǵan jáne qorshalǵan. Eshqandaı qaýip joq, — dedi oblystyq veterınarııa basqarmasy basshysynyń orynbasary.

Basqarma bergen aqparatqa qaraǵanda, veterınarııalyq qyzmetter sý tasqynynan ólgen aýyl sharýashylyǵy janýarlaryn veterınarııalyq-sanıtarııalyq talaptar boıynsha joıý jumysyn júrgizýde. Jaǵdaı baqylaýda.

Eske sala keteıik, budan buryn BQO ákiminiń orynbasary sý tasqynynan zardap shekken turǵyndardan ótinishter qabyldanyp jatyrǵanyn aıtqany týraly jazǵan bolatynbyz. 

Onda oblys ákiminiń orynbasary Qalııar Aıtmuhambetov aýdandarda shyǵynǵa ushyraǵan 115 bas iri qara, 1 246 usaq mal, 23 jylqy, 81 úı qusynyń ólekseleri órtelip, arnaıy qazylǵan shuńqyrlarǵa kómilgenin keltirgen edi.