BQO-da tárbıe jumysy ortalyǵynyń dırektory ulyn lagerdegi jumysqa zańsyz qabyldaǵan

Batys Qazaqstan oblysynda tárbıe jumysy ortalyǵynyń dırektory balasyn jumysqa zańsyz kirgizgen, dep habarlaıdy Kazinform.

BQO prokýratýrasynan túsken málimetke qaraǵanda, zańbuzýshylyq Báıterek aýdanynyń prokýratýrasy balalar lagerlerinde tekseris júrgizgen kezde anyqtaldy.

Tekserý barysynda «Tárbıe jumysy ortalyǵy» MKQK dırektorynyń «Jas ulan» balalar lagerine tıisti bilimi jáne biliktiligi joq óziniń balasyn jumysqa zańsyz qabyldaǵany belgili boldy. Sonymen qatar oǵan belgilengen mólsherden artyq jalaqy aýdarylǵan. 

«Aýdan prokýratýrasynyń qadaǵalaý aktisimen quqyqqa syıymsyz artyqshylyq bildirgeni úshin MKQK dırektory «Memlekettik qyzmet týraly» Zańnyń 50-babynyń 1-tarmaǵynyń 4-tarmaqshasy negizinde qyzmetke tolyq sáıkes emestigi týraly eskertý túrindegi tártiptik jaýapkershilikke tartyldy. Artyq aýdarylǵan jalaqy memleketke qaıtaryldy. 

Budan bólek, «Dostyq» balalar lageriniń ǵımaraty apatty jaǵdaıda ekeni jáne balalar lageriniń jumysyn sanıtarlyq-epıdemıologııalyq, órt qaýipsizdigi talaptaryn saqtamaı júrgizgeni anyqtaldy. Sondaı-aq 13 lager jumysshysynda tıisti medıtsınalyq ruqsat bolmaǵan. Oǵan qosa balalar lageriniń meńgerýshisi tulǵalardy jalǵan jumysqa ornalastyrý arqyly bıýdjet qarajatyn jymqyrǵan jáne senip tapsyrylǵan múlikti talan-tarajǵa salǵan.

Báıterek aýdany prokýratýrasynyń bastaýymen Qylmystyq kodekstiń 189-babynyń 2-bóligi (adamdar tobynyń aldyn ala sóz baılasýymen qyzmet babyn paıdalanyp bótenniń múlkin talan-tarajǵa salý) jáne 190-babynyń 2-bóligimen (qyzmet babyn paıdalanyp jasalǵan alaıaqtyq) qylmystyq ister tirkeldi.

Keıinnen memleketke keltirilgen zalaldyń tolyq kólemde ótelýine baılanysty qylmystyq ister aqtalmaıtyn negizder boıynsha toqtatyldy», - dep habarlady vedomstvodan.