BQO-da talapqa saı kelmeıtin sheteldik ónimder anyqtaldy
ORAL. QazAqparat - Batys Qazaqstan oblysynda sheteldik ónimderdiń talapqa saı emestigi belgili boldy, dep habarlaıdy QazAqparat tilshisi.
BQO qoǵamdyq densaýlyq saqtaý departamentinen túsken málimetke qaraǵanda, ótken aıda 357 ónim synamaǵa satyp alynǵan.
«Ulttyq saraptama ortalyǵy» oblystyq fılıalynda saraptamadan ótkizilgen kezde 57 ónimniń Kedendik odaqtyń tehnıkalyq reglamentteri talaptaryna saı kelmeıtini anyqtaldy.
Mamandar saýda oryndarynda, ásirese, ónim markasynyń sáıkessizdigin, aqparattyń memlekettik tilde jazylmaýyn, daıyndalý merzimi, ataýy, qaı jerden shyqqandyǵy kórsetilmeýin jıi kezdestiredi.
Sáıkessizdikter alys jáne jaqyn shet elder ónimderine tán bolyp otyr. Mysaly, reseılik «Fabrıka kachestva», «Ametıst» kásiporyndarynyń et jáne qus ónimderin, «Engels sút kombınatynyń» sút ónimderin, Belarýstan «Santa-Bremordyń» balyq ónimderin, AQSh pen Qytaıdan shyqqan jemis-jıdekterdi ataýǵa bolady.
Ónerkásip taýarlarynan sáıkessizdik qytaılyq oıynshyqtardan, atap aıtqanda, belgisiz óndirýshi shyǵarǵan «BLACK WIDOW» órmekshisi, «Aqyldy kúshik», «NERF» tapanshasynan jıi ushyrasty. Sondaı-aq jeńil ónerkásip ónimderinen Qyrǵyzstannan «LUX» áıelder ıýbkasyn, balalar kóılegi men sábıler kıimin, túrkııalyq «Wienella Sistina» fırmasynyń áıelder vodolazkasyn aıtýǵa bolady. Sol sekildi ırandyq «MILAD» fırmasynyń balalarǵa arnalǵan ónimderi, frantsııalyq «CHANCE CHANEL» fırmasynyń áıelder ıissýi, fınlıandııalyq «LUMENE OY»-diń «LUMENE Klassiko» geli de talapqa saı bolmaı shyqty.
«Barlyq anyqtalǵan derekter boıynsha Qazaqstan zańnamasyna sáıkes sharalar alynýda. Aıtalyq, departament arqyly buzýshylyqtardy joıý úshin 15 uıǵarym berildi. 20 kelideı ónim sóreden alyndy», dep habarlady oblystyq qoǵamdyq densaýlyq saqtaý departamentinen.
Eske sala keteıik, budan buryn óńirde keıbir ónimderdiń talapqa saı kelmeıtinin jazǵan bolatynbyz. Oǵan qosa oblystaǵy densaýlyq saqtaý nysandarynda sanıtarlyq talaptardyń saqtalmaıtyny anyqtaldy.
