BQO-da taǵy da kıikti zańsyz aýlaǵandar ustaldy
ORAL. QazAqparat - Batys Qazaqstan oblysynda taǵy da kıikti zańsyz aýlaǵandar ustaldy, dep habarlaıdy «QazAqparat» tilshisi.
QR AShM Orman sharýashylyǵy jáne janýarlar dúnıesi komıtetinen túsken málimetke qaraǵanda, 17 jeltoqsan kúni saǵat 03.30 shamasynda BQO orman sharýashylyǵy jáne janýarlar dúnıesi ınspektsııasy basshysynyń orynbasary Z.Turalıev jáne «Ohotzooprom» ÓB» RMQK Oral óńirlik fılıalynyń ınspektorlary Jańaqala aýdany Jańajol aýyldyq okrýgine qarasty Sarykól eldi mekeni aýmaǵynda VAZ-2107 avtokóligin toqtatty. Avtokólikte 1987, 1988 jáne 1990 jylǵy úsh turǵyn bolǵan. Tekserý barysynda avtokólikten jáne oqıǵa oryn alǵan jerden 4 dana kıik múıizi, bir qolara, 16 kalıbrli bir uńǵyly myltyq pen múıizderi kesilgen 4 kıik tekesiniń ushasy tabylǵan. Oqıǵa ornyna Jańaqala aýdandyq ishki ister bóliminiń jedel tergeý toby shaqyrylyp, qylmystyq is qozǵaldy.
Sondaı-aq 18 jeltoqsanda saǵat 02.40 shamasynda «Ohotzooprom» ÓB» RMQK Oral óńirlik fılıalynyń ınspektorlarymen Qaztalov aýdany Qarasý aýyldyq okrýgi Juldyz aýyly mańynda dalalyq jerde «ÝAZ Patrıot» avtokóligi toqtatyldy. Tekserý barysynda atalmysh avtokólikten jáne oqıǵa bolǵan jerden 12 kalıbrli 1 uńǵyly myltyq, 10 dana oq-dári, 10 dana eresek jáne 1 dana urǵashy kıiktiń ushasy tabyldy. Oqıǵa ornyna Qaztalov aýdandyq ishki ister bóliminiń jedel tergeý toby shaqyrylyp, qylmystyq is qozǵaldy.
Eske sala keteıik, budan buryn Bókeı orda aýdany Súıektijyra aýmaǵynda eki turǵyn ustalǵan bolatyn.
