BQO-da taǵy bir turǵynnyń quldyqta bolǵany anyqtaldy
ORAL. QazAqparat – Batys Qazaqstan oblysynda taǵy bir turǵynnyń quldyqta ustalǵany anyqtaldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekov málim etkendeı, oqıǵa «Stop trafık» jedel aldyn alý sharasy barysynda belgili bolǵan.
Syrym aýdanynda sharýa qojalyǵynyń basshysy bıylǵy mamyr men qyrkúıek aralyǵynda qystaqtardyń birinde 57 jastaǵy turǵyndy óz erkinen tys, zańsyz ustaǵan. Atap aıtqanda, malyn baqtyrǵan.
Qazirgi kezde QR QK 126-babyna (bas bostandyǵynan zańsyz aıyrý) sáıkes sotqa deıingi tergeý amaldary júrgizilýde.
Eske sala keteıik, budan buryn BQO-da qojalyq basshysynyń 3 adamdy quldyqta ustap, malyn baqtyrǵanyn jazǵan bolatynbyz.
