BQO-da taǵy bir turǵyn úıdiń tóbesi qulady
ORAL. QazAqparat - Batys Qazaqstan oblysynda qardyń kóptiginen taǵy bir turǵyn úıdiń tóbesi qulady, dep habarlaıdy QazAqparat tilshisi.
BQO TJ departamentiniń baspasóz qyzmetinen alynǵan málimetke qaraǵanda, oqıǵa keshe Tasqala aýdany ortalyǵynda boldy.
Tasqala aýylynda Abaı kóshesi, 21-mekenjaıynda 6 páterlik, bir qabatty turǵyn úıdiń shatyrynyń bir bóligi qulaǵan. Onyń aýmaǵy 72 sharshy metrdi qurady.
Zardap shekkender joq.
Bıylǵy qysta oblysta osyndaı 12 derek tirkelse, sonyń jeteýi Oral qalasynda oryn aldy.
Sonymen qatar Terekti aýdany Podstepnyı aýyly Geologııa kóshesi 60-mekenjaıynda 9 páterlik turǵyn úıdiń tóbesi sondaı jaǵdaıǵa ushyrady. Al Tasqala aýdanynda budan buryn eki úıdiń shatyry búlingen bolatyn. Abyroı bolǵanda, zardap shekkender joq.
Eske sala keteıik, budan buryn Oralda turǵyn úı men balabaqshanyń tóbesi qulaǵanyn jazǵan bolatynbyz.
Sondaı-aq óńirde 800-den astam adam qar qursaýynan qutqaryldy.
Búgin aýa raıynyń buzylatyny jóninde eskertý jarııalanyp, qutqarýshylar bes aılyq sábıdi aýrýhanaǵa jetkizdi.
