BQO-da taǵy bir ózende sý deńgeıi kóterildi
ORAL. QazAqparat - «Qazgıdromet» RMK Batys Qazaqstan oblystyq fılıalynyń málimetine qaraǵanda, búgin Bykovka-Chebotarev gıdrobeketinde sýdyń deńgeıi 802 santımetrge deıin kóterildi, dep habarlaıdy «QazAqparat» tilshisi.
Osyǵan baılanysty BQO Tótenshe jaǵdaılar departamenti eskertý jarııalap, qazirgi kezde tıisti sharalar qolǵa alynýda.
Departamenttiń bas mamany, azamattyq qorǵaý kapıtany Azamat Nurpeıisovtiń aıtýynsha, Zelenov aýdany Hamıno aýyly mańyndaǵy sý deńgeıi keshe 808 santımetrge deıin jetse, búgin qaıtý ústinde. Jaǵdaıdy jergilikti bılik organdary men TJ mamandary qadaǵalaýda.
Eske sala keteıik, budan buryn 7 sáýir kúni saǵat 23.00-de Derkól-Tasqala gıdrobeketinde sý deńgeıi 519 santımetrge, ıaǵnı qaýipti shegine jetkeni jóninde habarlanyp, eskertý jarııalanǵan bolatyn.
Derkól ózenine quıatyn arnamen jóńkilgen sý jaıylyp, Tasqala aýylyndaǵy 25 úıge qaýip tóndirdi. Sol boıda qum toltyrylǵan 1200 qap tóselip, bóget jasaldy. Bul jumystarǵa jergilikti jerden 12 tehnıka, 39 adam, aýdandyq TJ bóliminen 1 tehnıka men qos maman jumyldyryldy. Degenmen 8 sáýir kúni bir úıge sý kirgeni anyqtaldy. Ieleri sý kelgen mezgilde úılerinde bolmaǵan.
