BQO-da taǵy 6 medıtsına qyzmetkerinen koronavırýs anyqtaldy
ORAL. QazAqparat – Batys Qazaqstan oblysynda 30 sáýir kúngi málimet boıynsha koronavırýs juqtyrǵan 8 adam tirkeldi, dep habarlaıdy QazAqparat tilshisi.
BQO ákimdigi málim etkenindeı, eki adamnyń biri – Reseıde jumys jasaıtyn 29 jastaǵy oblys turǵyny, ekinshisi – sol eldiń joǵary oqý ornynda oqıtyn Shymkent qalasynyń 18 jastaǵy turǵyny.
Olar Reseımen shektesetin «Tasqala» jáne «Syrym» avtoótkelderinen ótken kezde densaýlyqtaryna shaǵymy bolmaǵan. Algorıtmge sáıkes jedel járdem shaqyrylyp, karantındik statsıonarǵa jatqyzylǵan kezde aýrýǵa shaldyqqany anyqtaldy.
Qalǵan 6 adam – medıtsına qyzmetkeri. Olardyń bári koronavırýs juqtyrý qaýpi joǵary medıtsına qyzmetkeri retinde tekserilgen bolatyn.
Segiz naýqas ta oblystyq juqpaly aýrýlar aýrýhanasyna ornalastyryldy. Olarmen qarym-qatynasta bolǵan adamdar anyqtalyp, medıtsınalyq baqylaýǵa alyndy.
Aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 146-ǵa jetip, sonyń 9-y emdelip shyqty.
BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵalı Aryspaev oblystyq juqpaly aýrýlar aýrýhanasy men karantındik statsıonardaǵy dárigerler men medbıkelerdiń úılerine barmaı, jataqhana men qonaqúıde jatyp, qyzmet atqaryp júrgenin, olardyń ár 14 kún saıyn saıyn skırıngtik tekserýden ótkizilip jatqanyn jetkizdi.
«Sondaı tekserý qorytyndysy nátıjesinde sońǵy eki táýlikte 10 medbıkeniń aýrý juqtyrǵany belgili boldy. Olarmen qarym-qatynasta bolǵan 11 medıtsına qyzmetkeri karantındik statsıonarǵa jatqyzyldy. Medıtsına qyzmetkerleri aldaǵy ýaqytta da skırıngtik tekserýden ótetin bolady», dedi M.Aryspaev.
Oblysta tirkelgen 146 naýqastyń 119-y nemese 86 paıyzy – deni Reseıden, sondaı-aq Atyraý oblysynan kelgender, 26-sy – buryn aýyrǵandarmen baılanysta bolǵandar. Bir naýqastyń qaıdan juqtyrǵany anyqtalý ústinde.
«Oblystyq juqpaly aýrýlar aýrýhanasynda emdelip jatqan naýqastardyń 80 paıyzy jeńil, qalǵan 20 paıyzy ortasha aýyr halde. 6 emdelýshide pnevmonııa bolǵanymen, tynys alýy qalypty», dedi oblystyq densaýlyq saqtaý basqarmasynyń basshysy Bolatbek Qaıýpov.
Eske sala keteıik, budan buryn BQO-da koronavırýs anyqtalǵan 11 naýqastyń jeteýi Túrkistan oblysynyń turǵyndary ekendigin jazǵan bolatynbyz.
