BQO-da taǵy da ushqyshsyz ushatyn apparattyń bólshekteri tabyldy

ORAL. KAZINFORM - Batys Qazaqstan oblysy Jánibek aýdany Qamysty aýyldyq okrýgi aýmaǵynda belgisiz ushqyshsyz ushatyn apparattyń bólshekteri tabyldy.

Jánibek aýdany ákimdiginen túsken málimetke qaraǵanda, oqıǵa 26 naýryz kúni aýdan ortalyǵynan 55 shaqyrym qashyqtyqta boldy.

Shamamen saǵat 10.30-da apparat bólshekteri tabylǵany jóninde habarlama túsken.

- Oqıǵa ornyna aýdandyq prokýratýra, aýdandyq polıtsııa bóliminiń jedel tergeý jáne qorshaý toby, tótenshe jaǵdaılar bólimi, jergilikti atqarýshy bılik jáne aýdandyq shekara basqarmasynyń ókilderi bardy. Qazirgi kezde oqıǵanyń mán-jaıy anyqtalyp jatyr, - dep habarlady vedomstvodan.

BQO polıtsııa departamentiniń baspasóz qyzmeti Jánibek aýdanynda ushqyshsyz ushatyn apparattyń bólshekterine uqsas zattyń tabylýyna baılanysty tekserý júrgizilip jatqanyn jetkizdi.

Buǵan deıin osyndaı oqıǵalar Bókeı ordasy aýdany Uıaly, Tasqala aýdany Atameken jáne Jánibek aýdany Uzynkól aýyly mańynda bolǵan edi.

Eske sala keteıik, budan buryn BQO-da ushqyshsyz ushatyn apparattyń bólshekteri tabylǵanyn jazǵan bolatynbyz.