BQO-da tabylǵan medıtsınalyq qaldyqtardyń jaı-japsary belgili boldy
ORAL. KAZINFORM — Budan buryn habarlanǵanyndaı, Báıterek aýdany Baıqonys aýyldyq okrýgindegi qoqys polıgonynan medıtsınalyq qaldyqtar tabylǵan bolatyn.
BQO sanıtarııalyq-baqylaý departamenti basshysynyń orynbasary Gúldana Kereevanyń málim etkenindeı, qaldyqtar anyqtalǵan aýmaq polıtsııa qyzmetkerleriniń kúzetýine alyndy.
Onyń sózine qaraǵanda, sanıtarııalyq-epıdemıologııalyq qyzmet mamandary ekologııa departamentiniń ókilderimen birlesip topyraq synamalaryn alyp, mıkrobıologııalyq kórsetkishterge (kolı-tıtr jáne Clostridium perfringens) jáne sanıtarııalyq-hımııalyq kórsetkishterge (rN jáne nıtrattar) zerthanalyq zertteýler júrgizýge joldady. Zerthanalyq zertteýlerdiń aldyn ala nátıjeleri 3-7 kún ishinde shyqpaqshy.
- Qaldyqtar anyqtalǵan jerde jáne oǵan irgeles aýmaqta quramynda hlor bar preparattardy qoldana otyryp dezınfektsııalyq is-sharalar júrgizildi. Qazirgi ýaqytta atalǵan fakti boıynsha tergeý amaldary júrgizilip jatyr. Aldyn ala málimetter boıynsha qaldyqtardyń salmaǵy – 144 kılogramm. Mundaı qaldyqtar mýfeldik peshte órtelýi tıis. Olardy qoqys alańy nemese qatty turmystyq qaldyqtar polıgonynda kómýge tyıym salynǵan, - dedi G.Kereeva.
Zańnamany buzǵandarǵa QR Ákimshilik quqyqbuzýshylyq týraly kodekstiń 425-babyna (sanıtarııalyq-gıgıenalyq talaptardy buzý) sáıkes aıyppul qarastyrylǵan.
BQO densaýlyq saqtaý basqarmasynyń naqtylaýynsha, memlekettik satyp alý portalynda júrgizilgen ashyq konkýrs qorytyndysyna sáıkes «Kemel» JK medıtsınalyq qaldyqtardy tasymaldap, mýfeldik peshte joıýdy mindetine alǵan.
BQO boıynsha ekologııa departamentinen túsken málimetke qaraǵanda, júrgizilgen bastapqy zerdeleý jumystarynyń nátıjesinde medıtsınalyq qaldyqtardy atalǵan polıgon aýmaǵyna «Kemel» JK-nyń zańsyz ákelgeni anyqtaldy.
Topyraq synamalaryna sáıkes zerthanalyq zertteýlerdiń nátıjeleri boıynsha qorshaǵan ortaǵa keltirilgen yqtımal zalaldyń deńgeıi aıqyndalatyn bolady.
Sonymen qatar atalǵan derek boıynsha ekologııa departamenti tarapynan jospardan tys tekserý júrgizý máselesi qarastyrylyp, qazirgi ýaqytta tekserýdi bastaý baǵytynda tıisti uıymdastyrý jáne daıyndyq jumystary júrgizilip jatyr. Tekserý nátıjeleri boıynsha qoldanystaǵy zańnama talaptaryna sáıkes tıisti ákimshilik jáne ózge de sharalar qabyldanady.
Eske sala keteıik, budan buryn BQO-da aýyldaǵy qoqys polıgonynan medıtsınalyq qaldyqtar tabylǵanyn jazǵan edik.
