BQO-da tabylǵan medıtsınalyq qaldyqtardyń qaıdan shyqqany belgili boldy
ORAL. KAZINFORM — Batys Qazaqstan oblysy Báıterek aýdany Baıqonys aýyldyq okrýgi mańynan tabylǵan medıtsınalyq qaldyqtarǵa júrgizilgen alǵashqy zerthanalyq tekserý nátıjesinde qaýipti mıkrobıologııalyq kórsetkishter anyqtalǵan joq.
Bul týraly BQO Sanıtarlyq-epıdemıologııalyq baqylaý departamentiniń bashysy Dınara Jańabergenova málimdedi.
Buǵan deıin áleýmettik jelilerde dalaǵa tastalǵan medıtsınalyq qaldyqtar men qan qutylarynyń vıdeosy taraǵan bolatyn.
Oqıǵadan keıin sanıtarııalyq-epıdemıologııalyq baqylaý, polıtsııa jáne ekologııa salasynyń mamandary birlesip tekserý júrgizip, qaldyqtardyń shyǵý tegi men qorshaǵan ortaǵa yqtımal áserin zertteýge kirisken.
Departament basshysy Dınara Jańabergenovanyń aıtýynsha, oqıǵa ornynan barlyǵy 144 medıtsınalyq qaldyq anyqtalǵan.
— Quqyq qorǵaý organdary, ekologııa departamenti jáne bizdiń sala mamandary oqıǵa ornynda birlesken zerdeleý jumystaryn júrgizdi. 144 medıtsınalyq qaldyq anyqtaldy. Polıtsııa qyzmetkerlerimen birge barlyq materıal tárkilendi. Sonymen qatar sol aýmaqtan topyraq úlgileri alynyp, mıkrobıologııalyq zertteýge jiberdik. Alǵashqy zertteý nátıjeleri boıynsha oń kórsetkishter anyqtalǵan joq, alaıda zertteý jumystary áli jalǵasyp jatyr, — dedi ol Jibek Joly telearnasynyń «Búgin.LIVE» baǵdarlamasynda.
Mamannyń sózinshe, medıtsınalyq qaldyqtar qorshaǵan ortaǵa qaýip tóndirýi múmkin bolǵandyqtan, anyqtalǵan aýmaqta shuǵyl zalalsyzdandyrý sharalary júrgizilgen.
— Bul bıomaterıaldardyń qorshaǵan ortaǵa zııany bolýy múmkin. Sondyqtan medıtsınalyq qaldyqtar tabylǵan aýmaqta tolyq zalalsyzdandyrý jumystary júrgizildi. Qazirgi ýaqytta qaýiptiń aldyn alý sharalary oryndalyp, oshaq tolyqtaı óńdeldi, — dedi Dınara Jańabergenova.
Tekserý barysynda qaldyqtardyń Oral qalasyndaǵy № 1, № 2 jáne № 4 emhanalarǵa tıesili ekeni anyqtalǵan. Alaıda qazirgi kezeńde atalǵan medıtsınalyq uıymdardyń tarapynan zańbuzýshylyq faktileri tirkelmegen.
— Emhanalar medıtsınalyq qaldyqtardy kelisimshart negizinde arnaıy ýtılızatsııamen aınalysatyn kásiporyndarǵa ótkizedi. Qazir barlyq mán-jaı tergep-tekserý aıasynda anyqtalyp jatyr. Medıtsınalyq qaldyqtardy joıýmen aınalysatyn uıymdardyń qyzmeti qatań baqylaýǵa alynady jáne zańnamaǵa sáıkes tıisti sharalar qoldanylady, — dedi SEB ókili.
Budan buryn medıtsınalyq qaldyqtardyń ýtılızatsııasyn zańsyz júrgizgen ShQO kompanııalary tekseriletinin jazdyq.
