BQO-da Syrym Datulynyń 275 jyldyǵyna arnalǵan sharalar bastaldy
ORAL. QazAqparat - Búgin J.Moldaǵalıev atyndaǵy oblystyq ǵylymı-ámbebap kitaphanasynda ataqty kósem, sheshen ári qol bastaǵan batyr Syrym Datulynyń 275 jyldyǵyna arnalǵan onlaın konferentsııa bolyp, «»El bastaǵan kósem, sóz bastaǵan sheshen» atty kitap kórmesi ashyldy, dep habarlaıdy «QazAqparat» HAA tilshisi.
Konferentsııa barysynda oraldyqtar Almatydaǵy Ulttyq kitaphanamen, aýdandyq kitaphanalarmen, Syrym Datuly týraly jazylǵan «Tar kezeń» romanynyń avtory, Memlekettik syılyqtyń laýreaty, qazir Astanada turatyn Qajyǵalı Muhambetqalıevpen tikeleı baılanysqa shyǵyp, uly dala kósemi týraly aıtyp, óz oı-pikir, usynystarymen bólisti.
BQO mádenıet, muraǵattar jáne qujattama basqarmasynyń basshysy Dáýletkereı Qusaıynov osylaısha bastaý alǵan Syrym Datulynyń 275 jyldyǵyna arnalǵan sharalardyń jyl boıy jalǵasatynyn jetkizse, ólketanýshy Jaısań Aqbaı, tarıh ǵylymdarynyń kandıdaty Samat Qurmanalın uly tulǵanyń ómiri men azattyq jolyndaǵy kúresine, sheshendik murasynyń mol ekendigine toqtaldy.
Búginnen bastap Syrym Datulynyń 275 jyldyǵyna arnalǵan mereıtoılyq arnaıy logotıpke baıqaý jarııalandy. Bir aı boıy ótetin baıqaýǵa elimizdegi sýretshilerdiń kez kelgeni qatysa alady. Syrym aýdanyndaǵy Syrym Datuly atyndaǵy tarıhı-ólketaný murajaıynyń meńgerýshisi Aınagúl Oıshybaevanyń aıtýynsha, logotıptegi beıne úsh tústen aspaýy kerek. Baıqaý 12 aqpanda qorytyndylanyp, bir ǵana jeńimpaz anyqtalady.
Aıta keteıik, bıyl sondaı-aq «Alash» qozǵalysynyń 100 jyldyǵy, Alashorda kósemderiniń biri Jahansha Dosmumahedovtiń 130 jyldyǵy keńinen atalyp ótilmekshi.
