BQO-da sybaılas jemqorlyqtyń basym bóligi ákimdik qyzmetkerlerine qatysty bolyp otyr

ORAL. QazAqparat  - Batys Qazaqstan oblysynda sybaılas jemqorlyq qylmystarynyń basym bóligi ákimdik pen onyń qurylymdyq bólimderiniń qyzmetshilerine qatysty bolyp  otyr. Bul týraly búgin óńirlik kommýnıkatsııalar qyzmetinde Sybaılas jemqorlyqqa qarsy is-qımyl ulttyq bıýrosy BQO boıynsha departamentiniń basshysy Rýstam Aqmyrzaev málim etti, dep habarlaıdy QazAqparat tilshisi.

Onyń aıtýynsha, bıyl sondaı 60 qylmys tirkelip, 12 adam jaýapkershilikke tartyldy.

Mysaly, Terekti aýdandyq №2 sotynyń úkimimen «Terekti - taza sý» JShS (ákimdik úlesi - 100 paıyz) dırektory Kárimov 5 jylǵa bas bostandyǵynan shekteldi. Ol seriktestiktiń 1,6 mln teńgesin ıemdenip, talan-tarajǵa salǵan.

Budan basqa memlekettik jáne úkimettik baǵdarlamalardy júzege asyrýǵa bólingen qarjy maqsatty jumsalmaı, 37 sybaılas jemqorlyq deregi tirkelgen.

Aıtalyq, Bórli aýdany boıynsha turǵyn úı-kommýnaldyq sharýashylyǵy, jolaýshylar tasymaly jáne avtomobıl joldary bóliminiń basshysy Sháripov, onyń orynbasary Isamalıev jáne jeke kásipker Tabıshevtiń zańǵa qaıshy is-áreketteri áshkerelendi. Olar aldyn ala sóz baılasyp, 2016 jyly «Jumyspen qamtýdyń jol kartasy - 2020» memlekettik baǵdarlamasy aıasynda aýyldar men nysandardy abattandyrýǵa Úkimettiń arnaıy qorynan bólingen 55 mln astam teńgeni qoldy qylǵan.

Bórli aýdandyq sotynyń 22 maýsymdaǵy úkimimen Sháripov pen Isamalıevtiń sáıkesinshe 3 jáne 2 jylǵa bas bostandyqtary shektelip, ómir boıyna memlekettik qyzmet atqarý quqyǵynan aıyryldy. Zalaldyń tolyq óndirilýine baılanysty jeke kásipker Tabıshevke qatysty qylmystyq qýdalaý aqtalmaıtyn negizde qysqartyldy.

Sonymen qatar mektep jáne mektepke deıingi mekeme dırektorlary men býhgalterleriniń is júzinde jumys jasamaıtyn adamdarǵa eńbekaqyny zańsyz esepteý jolymen bıýdjettik qarajatty urlaý derekteri de jyldan-jylǵa jalǵasyp keledi. Bıyl jyl basynan beri sondaı 8 qylmys ashylyp, 3 adam jaýapkershilikke tartyldy.

Jánibek aýdandyq sotynyń 25 maýsymdaǵy úkimimen Jánibek aýylyndaǵy «Altyn uıa» bóbekjaıynyń bas býhgalteri Faızýllına aıypty dep tanylyp, 6 jylǵa bas bostandyǵynan aıyryldy. Ol 2015-2017 jyldary QR bilim jáne ǵylymdy damytý memlekettik baǵdarlamasy («Balapan») aıasynda bólingen 5,8 mln teńgeni jymqyrǵan.

Aıta keteıik, BQO boıynsha sybaılas jemqorlyqqa qarsy kúres qyzmetimen bıylǵy alty aıda 105 qylmys tirkelse, sonyń 89-y nemese 85 paıyzy sybaılas jemqorlyqqa jatady.

Aıaqtalǵan qylmystyq ister boıynsha keltirilgen zalal mólsheri 115 mln teńge bolsa, sonyń 106 mln teńgesi (93 paıyzy) qaıtaryldy. Sotpen 111 mln teńge aıyppul taǵaıyndaldy.

Oblys boıynsha 29 adam sybaılas jemqorlyq qylmysyn jasasa, sonyń altaýy - birinshi (ekeýi oblystyq, úsheýi aýdandyq, bireýi qalalyq deńgeıdegi) basshylar.

Jalpy ashylǵan qylmystar sanynyń úshten biri (27) paraqorlyqqa baılanysty bolyp otyr.