BQO-da sybaılas jemqorlyqqa barǵan 56 qyzmetker qylmystyq jaýapkershilikke tartyldy
ORAL. QazAqparat - Batys Qazaqstan oblysynda 2016 jyly jáne bıylǵy jyl basynan beri sybaılas jemqorlyqqa barǵan 56 adam qylmystyq jaýapkershilikke tartylsa, sonyń 47-si sottaldy. Bul týraly sybaılas jemqorlyqqa qarsy is-qımyl máseleleri boıynsha óńirlik komıssııanyń kezekti otyrysynda aıtyldy, dep habarlaıdy «QazAqparat» tilshisi.
Sybaılas jemqorlyqqa qarsy is-qımyl jónindegi ulttyq bıýro oblystyq departamentiniń basshysy Maqsat Qojabaevtyń málim etkenindeı, alynyp jatqan sharalarǵa qaramastan, sybaılas jemqorlyq kórinisteri azaımaı keledi. Atap aıtqanda, 2016 jyly men bıylǵy bes aıda atalmysh departament óndirisinde 170 qylmystyq is bolsa, sonyń 121-i aıaqtalyp, 108-i sotqa jiberildi. Atalǵan merzimde sot úkimderimen salynǵan aıyppul kólemi 91 mln. teńgeden asty. Osy kezeńde 45 memlekettik qyzmetshi men oǵan teńestirilgen tulǵalar 114 sybaılas jemqorlyq qylmysyn jasady. 12 birinshi basshy men olardyń orynbasary qylmystyq jaýapkershilikke tartyldy. Oǵan qosa laýazymdyq qylmystary úshin 17 adam qarmaqqa ilikse, sonyń 9-y basshylar bolyp otyr.
Komıssııa otyrysyna qatysqan oblys ákimi Altaı Kólginov sybaılas jemqorlyqpen kúres máselelerine Elbasymyz birinshi kezekte mańyz berip otyrǵanyn, sondyqtan bul keseldiń aldyn alýǵa basa nazar aýdaryp, birlesken jumys sapasyn arttyrý, buǵan memlekettik organdarmen qatar úkimettik emes uıymdar, quqyq qorǵaý qurylymdary, jurtshylyq ókilderi belsene qatysýy qajettigin atap kórsetti.
