BQO-da suıytylǵan munaı gazyn tutyný kólemi artty
ORAL. KAZINFORM – Batys Qazaqstan oblysynda 111 avtogaz quıý stantsııasy bolsa, sonyń 52-si Oral qalasynda, 59-y aýdandarda ornalasqan.
BQO energetıka, turǵyn úı-kommýnaldyq sharýashylyq basqarmasy basshysynyń orynbasary Murat Qonysbaevtyń óńirlik kommýnıkatsııalar qyzmeti alańynda ótken brıfıngide málim etkenindeı, keıingi jyldary ınfraqurylym júıeli túrde keńeıip keledi. Mysaly, 2023 jyly oblysta 99, 2024 jyly 109 avtogaz quıý stantsııasy bolǵan edi.
Murat Keńesulynyń sózine qaraǵanda, óńirde suıytylǵan munaı gazyn tutyný kólemi de artyp otyr. Eger 2023 jyly 55 myń tonna bolsa, 2025 jyly 66 myń tonnaǵa jetip, 20 paıyzǵa ulǵaıdy.
– Gaz motor otynyn paıdalanatyn avtokólik quraldarynyń sany 31,8 paıyzǵa kóbeıip, 28 myńnan asty. Soǵan baılanysty suranys ta ósip otyr. 2024 jyldan bastap óńirdi negizinen «Jaıyqmunaı» JShS qamtamasyz etedi, onda «Rojkovskoe» ken ornynan alynatyn shıkizat óńdeledi. Qosymsha «Atyraý munaı óńdeý zaýyty» JShS men «SNPS-Aqtóbemunaıgaz» AQ tartylǵan, - deıdi M.Qonysbaev.
Ol jekelegen eldi mekenderde jetkizý logıstıkasyna jáne jańa ken ornyndaǵy aǵymdaǵy óndiristik úderisterge baılanysty qysqa merzimdi irkilister bolýy múmkin ekendigin aıtty. Degenmen óńirde suıytylǵan munaı gazynyń júıeli tapshylyǵy kútilmeıdi. Jaǵdaı tolyq baqylaýǵa alynǵan.
Basqarma derekterine sáıkes suıytylǵan munaı gazymen qamtamasyz etýdi turaqtandyrý maqsatynda birqatar shara qabyldanǵan. Atap aıtqanda, 2026 jyldyń II toqsanyna jetkizý kólemi 13 204 tonnaǵa deıin kóbeıtildi. Ortasha aılyq lımıt 3 500 tonnadan 4 600 tonnaǵa deıin kóterildi. Jetkizýshilermen jáne qaıta óńdeý kásiporyndarymen ózara is-qımyl kúsheıtildi.
– Jetkizilim kólemin ulǵaıtýǵa kóshý aldaǵy mamyr aıynan bastalady. Baǵa belgileý bóliginde memlekettik retteý qoldanylady. Shekti bólshek saýda baǵasy lıtrine 85 teńgeden, al shalǵaı aýdandar úshin 90 teńgeden keledi. Bizdiń negizgi mindetimiz – halyqty turaqty túrde qamtamasyz etý jáne naryqta baǵanyń kúrt aýytqýyna jol bermeý, - dep qosty basqarma basshysynyń orynbasary.
Eske sala keteıik, budan buryn Oralda júrgizýshiler suıytylǵan gaz tapshylyǵyna tap bolǵanyn jazǵan edik.