BQO-da sút bezi obyry boıynsha 30 myńnan astam áıel skrınıngten ótkizildi
ORAL. KAZINFORM — Batys Qazaqstan oblysynda bıyl sút bezi obyry boıynsha josparlanǵan turǵyndardyń 69,3 paıyzy nemese 30 170 áıel skrınıngpen qamtyldy.
BQO densaýlyq saqtaý basqarmasy basshysynyń mindetin atqarýshy Aınash Ǵubaıdýllınanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń nátıjesinde 36 áıelden sút bezi obyrynyń erte satysy anyqtaldy. Sondaı-aq 1 176-synan qatersiz isik jáne 5 096-synan qatersiz dısplazııalyq ózgerister tabyldy.
Aınash Jubanyshqyzynyń sózine qaraǵanda, jatyr moıny obyry boıynsha 22 940 áıel nemese 74,6 paıyzy tekserildi. Sonyń ishinde 3 áıeldiń jatyr moıny obyry, 297-siniń obyr aldy patologııaǵa shaldyqqany belgili boldy.
Sonymen qatar kolorektaldy obyr boıynsha 41 071 adam (79,2 paıyz) skrınıngten ótkizildi. Sonyń 10-ynan toq ishek obyry, 210-ynan obyr aldy patologııa anyqtaldy.
— Osy oraıda turǵyndardyń ózderi tirkelgen emhanalarda skrınıngtik tekserýden ýaqytyly ótýdiń mańyzy zor ekendigin eske salamyz. Bul qaterli isikterdi erte anyqtaýǵa múmkindik beredi. Óńirde onkologııalyq aýrýlarmen kúres jónindegi keshendi jospardy júzege asyrý aıasynda oblystyq onkologııalyq dıspanser joǵary tehnologııalyq medıtsınalyq qural-jabdyqtarmen kezeń-kezeńmen qamtamasyz etilýde, — deıdi A.Ǵubaıdýllına.
Onyń aıtýynsha, sońǵy úsh jylda onkologııalyq qyzmettiń materıaldyq-tehnıkalyq bazasy aıtarlyqtaı jańartyldy. Mysaly, 2023 jyly jalpy quny 6,6 mln teńge bolatyn 20 medıtsınalyq qural-jabdyq, 2024 jyly 125 mln teńgege 1 laparoskopııaǵa arnalǵan beıneendoskopty keshen, al 2025 jyly 1,7 mlrd teńgege 18 medıtsınalyq tehnıka satyp alyndy.
— Barlyq hırýrgııalyq operatsııada az ınvazıvti endoskopııalyq aralasýlardy júrgizýge múmkindik beretin argon-plazmalyq koagýlıatsııasy bar elektrohırýrgııalyq keshen keńinen qoldanylýda. Tsıtologııalyq dıagnostıka zerthanasyna suıyqtyq tsıtologııa apparaty men zamanaýı mıkroskoptan turatyn avtomattandyrylǵan jabdyq engizildi. Bul jatyr moıny obyryn jáne onyń obyr aldy ózgeristerin dıagnostıkalaý sapasyn edáýir arttyrdy. Bıylǵy jyly osy ádispen 22 951 áıel tekserildi, — dep qosty basqarma basshysynyń mindetin atqarýshy.
Eske sala keteıik, budan buryn BQO-da tabylǵan medıtsınalyq qaldyqtardyń jaı-japsary belgili bolǵanyn jazǵan edik.
