BQO-da sý munarasy qulap, bir adam joǵalyp ketti

ORAL. KAZINFORM — Batys Qazaqstan oblysy Bókeı ordasy aýdany ortalyǵy Saıqyn aýylynda sý munarasynyń qulaǵany jóninde áleýmettik jelide beınejazba tarady.

Bókeı ordasy aýdany ákimdiginen alynǵan málimetke qaraǵanda, 13 jeltoqsan kúngi saǵat 20.00-den bastap aýa raıynyń qolaısyzdyǵy men qatty jeldiń saldarynan elektrmen qamtýda úzilister boldy.

— Sondaı-aq Saıqyn aýylynda sý aıdaıtyn qosymsha munara (rezerv retinde paıdalanylady) qulap, isten shyqty. Bul turǵyndarǵa sý berýge kedergi keltirgen joq, sebebi negizgi munara tolyq kólemde jumys jasap turdy. Jeldiń saldarynan jaryq symdarynyń úzilýine baılanysty sý berý qysqa ýaqytqa toqtatyldy. Biraq ta aqaý joıylǵannan keıin negizgi munara arqyly turǵyndarǵa sý berý shtattyq rejımde júzege asyrylyp jatyr, — delingen resmı málimette.

Jeksenbi kúni saǵat 07.00-18.00 aralyǵynda aýdan boıynsha Bılaın, Aktıv, Tele2, Altel jáne «Kazaqtelekom» mobıldi baılanys operatorlarynyń uıaly baılanysy bolmady.

— Sonymen qatar 13 jeltoqsanda shamamen saǵat 21.00-de úıinen shyǵyp, osy ýaqytqa deıin oralmaǵan 25 jastaǵy Eltaı Qajyǵalıev joǵalyp ketti. Ony izdestirýge Bókeı ordasy aýdany TJ kúshteri (7 adam, 2 tehnıka), «Orda» shekara zastavasy (8 adam, 2 tehnıka), aýdandyq polıtsııa bólimi (17 adam men 5 tehnıka), jergilikti atqarýshy organnan 43 adam men 13 tehnıka jumyldyryldy. Oǵan qosa «Orda» shekara zastavasynyń 2 izdeý ıti de tartyldy, — dep habarlady Bókeı ordasy aýdany ákimdiginen.

Eske sala keteıik, budan buryn BQO-da boranǵa baılanysty birqatar aýdanda elektr jaryǵy óshkenin jazǵan edik.

Sondaı-aq BQO-da 16 myńnan astam abonent elektr jaryǵynsyz qaldy.