BQO-da sýmen tıimdi qamtamasyz etý baǵytynda birneshe joba qolǵa alyndy
ORAL. KAZINFORM – Sý – tirshilik ózegi. Osy oraıda Sý resýstary jáne ırrıgatsııa mınıstrligi «Qazsýshar» RMK Batys Qazaqstan fılıalynyń dırektory mindetin atqarýshy Raýan Husaıynov salada atqarylyp jatqan ister jóninde aıtyp berdi.
Memleket basshysy Qasym-Jomart Toqaev 2025 jylǵy 8 qyrkúıektegi «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda elimizde sý resýrstaryn tıimdi paıdalaný máselesine de toqtalǵan bolatyn.
Qazaqstan Prezıdenti: «Sý – strategııalyq mańyzy bar resýrs, sýsyz ómir joq. Sondyqtan bul sala ulttyq tsıfrlyq jańǵyrý jumysyndaǵy basty baǵyttyń biri bolýǵa tıis», - dep atap ótti.
Raýan Erlanulynyń sózine qaraǵanda, Batys Qazaqstan oblysynda sý resýrstaryn senimdi qamtamasyz etý jáne sý shyǵyndaryn azaıtý maqsatynda «Qazsýshar» RMK Batys Qazaqstan fılıaly Sý resýrstary jáne ırrıgatsııa mınıstrligimen birlese otyryp, birqatar sharany júzege asyryp otyr.
– Sonyń ishinde 50 jyldan astam ýaqyt boıy paıdalanylyp kelgen 3 sý qoımasy men jalpy uzyndyǵy 436 shaqyrymdy quraıtyn 7 magıstraldyq kanaldy qaıta jańǵyrtý boıynsha jobalyq-smetalyq qujattamalar ázirlenýde. Bul jobalar aıasynda sýdy esepke alý men gıdrotehnıkalyq ımarattardy basqarýdyń avtomattandyrylǵan júıelerin engizý kózdelgen, - deıdi R.Husaıynov.
Onyń aıtýynsha, qazirgi ýaqytta júzege asyrylyp jatqan Kırov sý qoımasyn qaıta jańǵyrtý, Kóshim magıstraldyq kanaly men Shaǵan ózeni tarmaǵyn mehanıkalandyrylǵan tazartý, sondaı-aq jańadan bastalatyn Jánibek sýlandyrý júıesine qarasty 192 shaqyrym arnalardy qaıta jańǵyrtý jobalarynda da avtomattandyrýdy engizý jumystary qarastyrylǵan.
Jyl saıyn sý sharýashylyǵy júıeleri men olardyń negizgi jabdyqtarynyń naqty tehnıkalyq jaǵdaıyn baǵalaý maqsatynda gıdrotehnıkalyq ımarattarǵa kóp faktorly zertteý jumystary júrgiziledi. Bul zertteýler ımarattardy durys paıdalanýǵa múmkindik berip, jobalaý jumystaryn júrgizýdiń negizdemesi bolyp esepteledi. 2024 jyly 3 nysan zerttelse, bıyl taǵy tórteýinde sondaı jumystar atqarylýda.
«Qazsýshar» fılıalynyń málimeti boıynsha 2024 jyly 13 nysanǵa aǵymdaǵy jóndeý júrgizilip, 74 kılometr kanal ishinara mehanıkalyq tazartýdan ótkizildi. 2025 jyly 26 nysandy jóndep, 144 shaqyrym arnany tazalaý josparlanǵan edi. Kúni búgin 11 nysan jóndelip, 100 shaqyrym arna tazartyldy, jumystar jalǵasyp jatyr.
Islam damý bankiniń qarjylandyrýymen Kaztalov aýdany Jalpaqtal aýyly tusynda kólemi 28,0 mln tekshe metr sý qoımasyn salý, Tasqala aýdanynyń Jaıyqbaı sýlandyrý kanalyn qaıta jańǵyrtý qolǵa alynbaqshy.
Sý resýrstary jáne ırrıgatsııa mınıstrliginiń qoldaýymen fılıaldyń avtokólik jáne arnaıy jer qazý-qurylys tehnıkasy parki jańartyldy. 2024-2025 jyldary 67 tehnıka satyp alý josparlansa, kúni búginge deıin sonyń 51-i jetkizildi. Arnaıy tehnıka jumys kúshimen birge fılıaldyń negizgi qyzmetterin atqaryp, sý sharýashylyǵy nysandaryn qalpyna keltirý jumystarynyń sapaly jáne ýaqytyly oryndalýyna, onyń jalpy nátıjeliligine septigin tıgizedi.
2024–2028 jyldarǵa arnalǵan sý sharýashylyǵyn damytýdyń keshendi jospary ázirlendi. Bul josparǵa oblys boıynsha 127 is-shara engizildi.
Taǵy bir atap óter jaıt, Batys Qazaqstan oblysy ákiminiń tapsyrmasyna sáıkes, Sý resýrstary jáne ırrıgatsııa mınıstrligimen birlesip, oblystaǵy sýarmalaý júıelerin biryńǵaı basqarý júıesine keltirý úshin jumystar júrgizilýde. Jaıyq-Kóshim jáne Jánibek sýarmalaý júıelerine tıesili uzyndyǵy 826 km bolatyn kanaldar men jalpy aýdany 57,0 myń gektardy quraıtyn kóldete sýarmalaý júıelerin kommýnaldyq menshikten respýblıkalyq menshikke berý jumystary atqarylýda. Jyl sońyna deıin bul sharalar tolyq máresine jetip, olardy qalpyna keltirý boıynsha birinshi kezektegi jáne negizgi jumys kólemderi anyqtalatyn bolady.
– Memleket basshysy atap ótkendeı: «Sý máselesin sheshý – áleýmettik turaqtylyqty saqtap, ekonomıkany damytýdyń kepili. Bul – ulttyq qaýipsizdikti qamtamasyz etetin basty faktordyń biri». Osyǵan baılanysty Batys Qazaqstan oblysyn sýmen kepildendirilgen jáne utymdy qamtamasyz etý baǵytyndaǵy jumystar jalǵasatyn bolady, - dep túıindedi sózin R.Husaıynov.
Eske sala keteıik, budan buryn Jaıyqtyń arnasy ózgerse, BQO-nyń 5 aýdanyna sý barmaı qalýy múmkin ekenin jazǵan edik.