BQO-da sýǵa ketken aýmaqtarda 350 oqýshyǵa oqý quraly tabys etildi
ORAL. KAZINFORM – Batys Qazaqstan oblysynda Qazaqstan halqy assambleıasynyń «Mektepke jol» qaıyrymdylyq aktsııasy aıasynda sýǵa ketken aýmaqtarda 350 oqýshy mektepke barýǵa qajetti jıyntyqtar men noýtbýkter aldy.
Oral qalasyndaǵy Saltanat saraıynda ótken is-sharada málim etilgenindeı, jańa oqý jylyna arnalǵan qural-jabdyqtar (noýtbýkter, maýsymdyq jáne sporttyq kıimder, rıýkzaktar) Oral qalasy men Bórli, Báıterek, Qaratóbe, Syrym, Terekti aýdandarynyń balalary úshin satyp alynǵan.
Bıyl kóktemde Oralda saıajaılar, atalǵan aýdandarda turǵyn úıler sýǵa ketkeni málim.
Freedom Holding Corp ujymynyń bastamasymen Qazaqstan halqy assambleıasy men assambleıa jastary uıymy birlesip uıymdastyrǵan is-sharaǵa qatysqan oblys ákimi Narıman Tóreǵalıev «Mektepke jol» aıasynda áleýmettik jaǵynan az qamtylǵan otbasylar balalaryn qoldaýdyń mańyzdylyǵyn atap kórsetti.
«Mektepke jol» qaıyrymdylyq is-sharasy ıgi dástúrge aınalyp, jetkinshek urpaqtyń jańa oqý jylyna oıdaǵydaı daıyndyqpen barýyna septesip keledi. Memleket basshysy atap ótkenindeı, bilim men ǵylym – tabysqa jetýdiń basty joly. Sondyqtan biz balalarymyzdyń jaqsy oqýy úshin barlyq qajetti qural-jabdyqpen qamtýǵa tıistimiz. Aktsııany uıymdastyrýshylarǵa alǵysymdy bildiremin», - dedi óńir basshysy.
QHA keńesiniń múshesi, «Assambleıa jastary» RQB tóraǵasy Tımýr Jumyrbaev Batys Qazaqstan oblysyna erekshe maqsatpen kelgenderin jetkizdi.
Onyń aıtýynsha, Freedom Holding kompanııasy qyzmetkerleriniń bastamasymen sýǵa ketken aýmaqtarda zardap shekken otbasylar balalaryna kómek kórsetý úshin qarjy jınalǵan.
«Qazaqstan halqy assambleıasy sý tasqyny bolǵan alǵashqy kúnnen bastap «Júrekten júrekke» jobasyn bastady. Qarapaıym adamdardyń kómek qolyn sozýy arqasynda zardap shekkenderge shamamen 1 mlrd teńge járdem berildi. Sý tasqyny kezinde Batys Qazaqstanǵa Almaty, Shymkent qalalary men Túrkistan oblysynan gýmanıtarlyq kómek jetkizilgeni belgili. Óńirde úıi sýǵa ketken bir otbasyǵa assambleıa atynan jańa baspana tartý etildi. Qazaqstan boıynsha bizdiń metsenattar qarjysyna barlyǵy 5 páter satyp alyndy. Mundaı synaqtar bizdiń birligimizdi nyǵaıta tústi. Memlekt basshysy Qazaqstan halqy assambleıasy men bizdiń eriktilerimizdiń eńbegin joǵary baǵalady. «Mektepke jol» aktsııalary elimizdiń barlyq qalalarynda ótkiziledi», - dedi T.Jumyrbaev.
Budan buryn Freedom Holding Corp sý tasqynynan zardap shekken óńirlerde turǵyn úılerdi qalpyna keltirý úshin 2,9 mlrd teńge bólgen bolatyn. Atalmysh kompanııa Batys Qazaqstan oblysynda eki úlken jobany júzege asyrmaqshy. Onyń biri Oral qalasynda botanıkalyq baq ashý bolsa, ekinshisi – múmkindigi shekteýli adamdarǵa arnalǵan sport kesheni.
«Freedom Holding Corp qyzmetkerleri óz erikterimen qaıyrymdylyq is-sharasyna úlesterin qosty. Biz óz qyzmetimizdi bir jylmen shektemeımiz. Sondyqtan mundaı jumystardy aldaǵy jyly da jalǵastyrmaqshymyz», - dedi «Freedom Shapaǵat» qaıyrymdylyq qorynyń prezıdenti Baǵlana Mýsına.
Eske sala keteıik, budan buryn Oral qalasynda úıleri sýǵa ketken 80 otbasynyń baspanaly bolǵanyn jazǵan edik.