BQO-da sýǵa batyp bara jatqan 19 jastaǵy jigit qutqaryldy
ORAL. QazAqparat - Batys Qazaqstan oblysynda 19 jastaǵy jigit sýǵa ketip qala jazdady, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen túsken málimetke qaraǵanda, oqıǵa búgin Báıterek aýdany «Saıa» demalys ornyndaǵy jasandy sý qoımasynda boldy.
«Jaǵajaı qutqarýshylary Abzal Ájiǵalı men Baqtııar Qaıratuly shomylyp júrgende, batyp bara jatqan jas jigitti qutqaryp qaldy. Sýdan shyǵarǵannan keıin onyń júregine massaj jasap, jasandy tynys aldyrdy. Esin jıǵannan keıin ol jedel járdem brıgadasyna tapsyryldy. Qazirgi kezde qalalyq kópbeıindi aýrýhanada dárigerlerdiń baqylaýynda», - dedi vedomstvodan.
Eske sala keteıik, budan buryn BQO-da 15 jastaǵy jasóspirimniń Jaıyq ózenine batyp ketkenin jazǵan bolatynbyz.
