BQO-da sýbsıdııa berý kezinde 12 mln-ǵa jýyq teńge orynsyz paıdalanylǵan

ORAL. KAZINFORM — Batys Qazaqstan oblysynda Syrym aýdany prokýratýrasy sýbsıdııa berý kezinde 12 mıllıonǵa jýyq teńge kóleminde bıýdjet qarajatyn teris paıdalaný faktilerin anyqtady.

BQO prokýratýrasynyń baspasóz qyzmetinen málim etkenindeı, 2023 jyly 11 mln 935 myń teńgege sýbsıdııalanǵan 1 154 bas maldyń saqtalý merzimi qamtamasyz etilmeı, aýyl sharýashylyǵy janýarlaryn birdeılendirý jónindegi derek qorynan esepten shyǵarylǵan.

Mysaly, aýyl sharýashylyǵy óndiristik kooperatıvi 2023 jyly 4 mamyrda 383 asyl tuqymdy iri qaraǵa 3 mln 830 myń teńge sýbsıdııa alyp, maldy bir jyldyń ishinde derek qor esebinen shyǵaryp tastaǵan.

Shyn mánisinde Aýyl sharýashylyǵy mınıstriniń 2019 jylǵy 15 naýryzdaǵy buıryǵymen bekitilgen asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalaryn bekitý týraly erejege sáıkes mal basynyń jyl boıy saqtalýyn (mal shyǵynynyń zootehnıkalyq normasyn qospaǵanda) qamtamasyz etý mindettelgen.

— Maldyń saqtalý merzimi buzylýy saldarynan memleketke 11 mln 935 myń teńge materıaldyq shyǵyn keltirildi. Zańdy buzý faktileri boıynsha quzyretti organǵa tıisti qadaǵalaý aktisi engizildi, qazir ol qaralý satysynda, — dep habarlady vedomstvodan.

Eske sala keteıik, budan buryn BQO-da demeýshilik qarajattyń jumsalýyna baılanysty qylmystyq is qozǵalǵanyn jazǵan bolatynbyz.