BQO-da sý joldyń ústimen ótip jatyr – TJD jaýap berdi
ORAL. KAZINFORM — Batys Qazaqstan oblysy Qaratóbe aýdanynda sýdyń joldyń ústimen ótip jatqany jóninde áleýmettik jelide beınejazba jarııalandy.
Beınejazbada er adam sarqyrap aǵyp jatqan sýdyń mol ekenin, jol ústimen ótip jatqanyn aıtady. Osyǵan baılanysty BQO TJ departamenti jaýap berdi.
Departamentten túsken málimetke qaraǵanda, aýdan ortalyǵy Qaratóbe aýylynan 2 shaqyrym jerde jergilikti mańyzy bar Qaratóbe-Qaraqamys avtojolynda jergilikti atqarýshy organdarmen sý tasqynyna qarsy is-sharalar aıasynda jumystar jasalýda. Atap aıtqanda, sý aǵyny eski arnamen jáne quıatyn jol tóseminen ótkizilýde.
— Qaratóbe aýdanynyń ákimdigi oblys basshylyǵymen kelisim boıynsha 2024 jyldyń jazynda sý aǵynyn eski arnamen jáne quıatyn jol tóseminen ótkizý týraly sheshim qabyldady. Atalǵan is-shara arnadaǵy sýdy aldyn ala ótkizý maqsatynda atqarylyp jatyr. Kólik qozǵalysy toqtatylmaǵan. Eldi mekenderge qaýip joq. Jergilikti atqarý organdar kúshterimen kezekshilik uıymdastyryldy, - dep habarlady vedomstvodan.
Eske sala keteıik, budan buryn Batys Qazaqstanda tasqyn sýdan keler qaýip qandaı ekenin jazǵan bolatynbyz.
Sondaı-aq BQO-da 32 myń adam syıatyn 317 ýaqytsha ornalastyrý pýnkti daıyn.