BQO-da sý tasqynynyń aldyn alý úshin 546,6 mln. teńge qaralyp otyr
ORAL. QazAqparat - Batys Qazaqstan oblysynda kóktemgi sý tasqynynyń aldyn alý baǵytynda tótenshe rezervte 546,6 mln. teńge qaraldy. Bul týraly búgin Ortalyq kommýnıkatsııalar qyzmeti óńirlik fılıalynda BQO TJ departamentiniń bastyǵy Jasulan Jumashev málim etti, dep habarlaıdy «QazAqparat» HAA tilshisi.
Onyń aıtýynsha, oblys aýmaǵynda sý tasqyny kezinde tótenshe jaǵdaılardy boldyrmaý maqsatynda keshendi sharalar alynýda. Mysaly, 335 tonna janar-jaǵar maı, 23 myń tonna ınertti materıal, 137 myń qapshyq daıyndaldy. Sonymen qatar oblystyq bıýdjetten muz jarý jumystaryn júrgizetin brıgadalardy tartýǵa 11,8 mln. teńge, áýeden sholyp tekserýge tikushaq tartýǵa 13,7 mln. teńge jáne ǵarysh monıtorıngisine 6,5 mln. teńge qarastyryldy. Qazirgi kezde tıisti mekemelermen belgilengen tártippen kelisim-sharttar jasalýda.
Oblys aýmaǵynda barlyǵy 200-ge jýyq ózen-kólder bolsa, sonyń ishinde Jaıyq, Shaǵan, Derkól, Qaraózen men Saryózen iri transshekaralyq ózender bolyp tabylady. «Qazgıdromet» RMK málimetine qaraǵanda, shaǵyn ózender men jabyq sý qoımalarynda muzdyń qalyńdyǵy 30-40 sm bolsa, Jaıyqta 40-45 sm-ǵa deıin jetken. Qar qory qalyptaǵydan joǵary. Mysaly, Jaıyq ózeninde 84 mm (qalypty mólsheri - 63 mm), Derkól men Shaǵanda 58 mm (48 mm), Qaraózen men Saryózende 57 mm (38 mm), Óleńti men Qaldyǵaıtyda 76 mm (50 mm).
Óńirde respýblıkalyq mańyzy bar avtojoldarda 439, jergilikti joldarda 1140 sý ótkizý qubyry bolsa, solardyń ishinde sý basýy yqtımal jerler anyqtaldy.
«Sý basý qaýpi bar aýmaqtarda turatyn turǵyndarǵa aldyn ala eskertilýde. Mysaly, Oraldaǵy Jaıyq, Shaǵan jáne Derkól ózenderiniń jaıylmalarynda 72 saıajaı birlestigi bolsa, solarda 2329 otbasy (11502 adam) turaqty turyp jatyr, sonyń 3718-i - balalar. Oblys boıynsha 48 ýaqytsha ornalastyrý pýnkti belgilense, sonyń 25-i Oralda. Sý tasqyny jaǵdaıynda iske qosylatyn 76 qurylymda 1946 adam, 920 tehnıka bar. Sý basý qaýpi bar jerler ınjenerlik tehnıkalary bar uıymdarǵa bekitilýde», dedi J.Jumashev.
