BQO-da sý tasqynynan zardap shekken aýyl turǵyndary jańa úılerge qonystandy
«Qazaqstan halqyna» qory sý basqan aýyldardyń turǵyndaryna 771,9 mln teńge somasyna 30 úıdiń qurylysyn qarjylandyrý boıynsha qaıyrymdylyq kómek kórsetti.
Qaratóbe aýdanynyń Shalǵyn aýylynda 23 bir qabatty bir páterli turǵyn úı jáne Jánibek aýdanynyń Jaqsybaı aýylynda 7 (3 eki páterli jáne 1 bir páterli) turǵyn úı salyndy. Páterlerdi tapsyrýǵa qaraı turǵyndardy qonystandyrý kezeń-kezeńmen júrgizildi.
Shalǵyn aýylynyń turǵyny Bekjan Masálimniń aıtýynsha, apat bolǵan kún áli esinde. Sol kúngi sý tasqynynan aýyldyń bir bóligi zardap shekti.
«Úıimiz jyly, ádemi. Qonystandyq, shaǵymymyz joq. Unap otyr. Kómek qolyn sozǵan barsha qurylysshylarǵa, ákimdik, Qor ókilderine rahmet. Qıyn jaǵdaıdy bastan ótkerdik, ońaı bolmady. Biraq qazir qýanyshtymyz, rızamyz jasalǵan jumysqa. Osyndaı qıynshylyq endi bolmasyn, demeý bolǵan barsha qaýymǵa alǵysymyz zor», - deıdi Shalǵyn aýylynyń turǵyny Bekjan Masálim.
Búginde turǵyndar jańa úılerge qonystanǵan. Páterlerge jaryq, gaz, sý men sanıtarlyq torap júrgizilgen.
«Qazaqstan halqyna» qoryna alǵysymdy bildiremin. Bıyl aýylymyz sý tasqynynan zardap shegip, turǵyndardyń úıleri men jergilikti mektep sý astynda qaldy. Qor qarajat bólip, mine, biz endi jańa jaıly úılerde turyp jatyrmyz», – deıdi Shalǵyn aýylynyń turǵyny Samal Maqsutova.
Esterińizge sala keteıik, 2022 jyldyń sáýir aıynda kenet jylyný men qardyń erýine baılanysty tasqyn sý óńirdegi birneshe eldimekendi basyp, turǵyn úıler sý astynda qaldy. Olardyń bir bóligi turýǵa jaramsyz bolyp shyqty.
21 shildede Qorǵa BQO ákiminiń orynbasary T.Qaıýpovtyń úı qurylysy úshin qarajat bólýge járdemdesý týraly ótinishi kelip tústi.
Oblys ákimdigi qajetti qujattardy usynǵannan keıin, 8 tamyzda «Qazaqstan halqyna» qorynyń Qamqorshylyq keńesi úıler qurylysy úshin qaıyrymdylyq kómek kórsetý týraly sheshim qabyldady. Qurylys barysyn baqylaýdy oblys ákimdigi júzege asyrdy.
Qıraǵan úıdiń sýreti – ashyq derekkózderden; jańa ǵımarattardyń sýreti - «Qazaqstan halqyna» qory