BQO-da sý tasqynynan zardap shekken turǵyndarǵa qosymsha 38 úı berildi
ORAL. KAZINFORM – Batys Qazaqstan oblysy Syrym aýdanynda sý tasqynynan zardap shekken turǵyndar úshin qosymsha 38 turǵyn úı boı kóterdi.
Alǵashqy turǵyn úılerdiń kiltteri bir apta buryn tabystalǵan edi. Bul joly Jympıty, Óleńti jáne Buldyrty aýyldarynda qalǵan baspana kiltteri aýyl turǵyndaryna berildi.
«Mine, jańa qonysqa kirip jatyrmyz. Prezıdentimizge, úı salǵan barsha azamattarǵa alǵysymdy bildiremin. Endi mundaı jaǵdaı bolmasyn elimizde. Aýylymyz kórkeıe bersin!», - dedi jańa qonys ıesi Jańyl Aıdarhanova.
BQO ákimdiginen alynǵan málimetke qaraǵanda, Batys Qazaqstan oblysynda sý tasqynynan zardap shekken turǵyndarǵa 889 úı salyndy. Onyń 451-i Oral qalasynda. Sondaı-aq, Oraldaǵy úıi sýǵa ketken saıajaı turǵyndaryna demeýshiler qarjysyna 2 myńnan astam baspana satyp alyndy.
Eske sala keteıik, budan buryn Oralda sý tasqynynan zardap shekken múmkindigi shekteýli jannyń sot arqyly ótemaqyǵa qol jetkizgenin jazǵan bolatynbyz.
