BQO-da sý tasqynynan zardap shekken taǵy 50 turǵyn baspanaly boldy
ORAL. KAZINFORM – Kóktemgi sý tasqyny saldarynan baspanasy jaramsyz dep tanylǵan Batys Qazaqstan oblysy Terekti aýdany Podstepnoe aýylynyń 50 turǵyny baspanaly boldy. Jańa úıler demeýshiler qarjysyna salyndy.
Turǵyn úılerdiń kiltterin tabystaý rásimine Batys Qazaqstan oblysynyń ákimi Narıman Tóreǵalıev qatysyp, qonys ıelerin quttyqtady.
Onyń aıtýynsha, Terekti aýdanynda salynyp jatqan 130 úıdiń 50-niń qurylysy aıaqtaldy. Qalǵan 80 úıdiń qurylysy qyrkúıek aıyna deıin aıaqtalmaq. Budan bólek, sý tasqynynan zardap shekken turǵyndar úshin BQO-nyń Terekti aýdanynda 30 úı satyp alynyp, 395 otbasynyń baspanasyna jóndeý jumystary júrgizildi.
Terekti aýdany Podstepnoe aýylynyń turǵyny Laýra Nysanovanyń úıi sý tasqyny kezinde jaramsyz dep tanyldy. Búgin ol januıasymen birge qonys toıyn toılap jatyr.
«Naýryz aıynyń sońynda úıimizdi sý basty. Bir qıyndyqtyń artynda jeńildik turady degen shyn sóz eken. Búgin baspanaly bolyp otyrmyz. Jaryq, keń 3 bólmeli, úlken, barlyq jaǵdaıy jasalǵan úıge qol jetkizgenimizge óte qýanyshtymyz. Osyndaı jaǵdaı jasaǵan Memleket basshysyna alǵysymdy bildiremin», - dedi Laýra Nysanova.
QR Ónerkásip jáne qurylys mınıstrligi Ahýaldyq ortalyǵynyń málimetinshe, Batys Qazaqstan oblysynda 775 úıdiń qurylysy júrgizilýde, turǵyn úı satyp alý jáne jóndeý jumystary jalǵasýda. Búgingi tańda zardap shekkenderge 130 jeke turǵyn úı salyndy, 1128 úı satyp alyndy, 1321 úıde jóndeý jumystary aıaqtaldy.
