BQO-da sý basý qaýpi bar aýmaqtarda ózender arnasy qanshalyqty tazartyldy

Jaıyq-Kaspıı basseındik sý ınspektsııasy basshysynyń orynbasary Qanat Óteǵalıevtiń málim etkenindeı, atalmysh josparǵa sáıkes 3 is-shara kózdelgen. 

Qanat Bolatulynyń sózine qaraǵanda, 2023 jyly Tasqala aýdanynyń Tasqala aýyly aýmaǵynda Derkól ózeniniń arnasyn tazalaý boıynsha jumystardy júrgizý jobasy ázirlendi. Tazalaý uzyndyǵy – 7 km. 

- Memlekettik saraptamanyń oń qorytyndysy alyndy. Jobanyń quny – 622,0 mln teńge. Osy maqsatqa respýblıkalyq bıýdjetten 435,0 mln teńge bólindi. Merdiger – «SMÝ-17» JShS. Jumystar bıyl 21 sáýirde bastaldy. Aıaqtaý merzimi – jyl sońyna deıin. Qazirgi ýaqytta jumystardyń 90 paıyzdan astamy oryndaldy, - deıdi Q.Óteǵalıev. 

Onyń aıtýynsha, taǵy bir mańyzdy joba Shyńǵyrlaý ózeniniń arnasyn tazalaý úshin jobalyq-smetalyq qujattama 2024 jyly ázirlendi. Tazalaý uzyndyǵy – 11 km. Jobalaýshy – «Ýralvodproekt» JShS. Joba memlekettik saraptamadan ótkizýge jiberiledi.

Sonymen qatar Oral qalasynda Shaǵan ózeniniń tarmaǵyn jáne Báıterek pen Aqjaıyq aýdanynda kanaldy mehanıkalyq tazalaý jumystary atqarylmaqshy. Atap aıtqanda, zemsnarıadpen Shaǵan ózeniniń tarmaǵyn (48 km) mehanıkalandyrylǵan tazalaý isi júrgiziledi. Kóshim kanalyn (13,5 km) tazartý barysynda batpaqty jerlerinde ekskavatordyń kómegimen arnasy keńeıtildi. Oǵan qosa kanalda sýdy avtomattandyrylǵan esepke alý júıesi jáne rettegish-basqarý qurylǵysy ornatylady. 

- Kóshim kanalynyń dambalary men arnasyndaǵy aǵashtar men butalar túbirimen alyndy. 2026 jyly Kóshim ózeni men Shaǵan tarmaǵynda uzyndyǵy 68 km ýchaskede ılosos zemsnarıadymen túbin tereńdetý jumystary júrgizilýde. 1 qyrkúıektegi málimet boıynsha Kóshim kanalynyń 4,1 km ýchaskesinde arnany mehanıkalyq tazalaý jumystary oryndaldy, - dep qosty Q.Óteǵalıev.

Eske sala keteıik, budan buryn BQO-da sýdy zańsyz paıdalanǵandarǵa 2,5 mln teńge aıyppul salynǵanyn jazǵan edik.