BQO-da sý basqan aýmaqtardan 6 myńnan astam adam evakýatsııalandy
ORAL. KAZINFORM — Sý tasqynyna baılanysty Batys Qazaqstan oblysynda 6 myńnan astam adam evakýatsııalansa, sonyń 3 myńy – bala.
BQO TJD jedel shtabynan málim etkenindeı, kúni búgin evakýatsııalyq pýnktilerge 1 myńnan astam adam ornalastyryldy. 3 853 adam týystarynyń úıine jaıǵasty.
Óńirde 23 jol ýchaskesiniń ústine sý shyǵyp ketken, 48 joldy sý shaıǵan. Bulardyń basym bóligi – jergilikti mańyzy bar jol.
Oblysta burynǵysynsha 10 eldi meken qatynassyz qalsa, sonyń 8-i Qaratóbe (Sýlykól, Úshana, Tólen, Temirbek, Qosbaz, Aqqozy, Qorjyn, Aqtaısaı), bireýi Terekti (Dýana), taǵy bireýi Shyńǵyrlaý aýdanynda (Aqtaý) ornalasqan. Bul aýyldarda aldyn ala eki apta merzimge jetetin azyq-túlik qory jasalǵan. Qaýipsiz jerlerge 3 myńnan astam mal aıdaldy.
Oblys boıynsha 804 773 tekshe metr sý sorylyp, qum toltyrylǵan 170 749 qap tóseldi.
Apattyq-qutqarý jumystaryna qazirgi tańda tótenshe jaǵdaılar, polıtsııa departamentteri, áskerı bólimder jáne jergilikti atqarýshy organdardan 1 979 adam (365 tehnıka, 76 sý soratyn motopompa) jumyldyrylǵan.
Ótken táýlikte 1500-den astam adam evakýatsııalansa, sonyń 700-den astamy – bala. Sondaı-aq Uzynkól, Barbastaý, Shaǵan, Kemer jáne ıÝbıleınyı aýyldarynda qalǵan turǵyndarǵa kóshý kerektigi habarlanyp jatyr.
Batys Qazaqstanda sý tasqyny jaǵdaıynyń kúrdelenýine baılanysty 29 naýryzǵa qaraǵan túni Mańǵystaý oblysy tótenshe jaǵdaılar departamentiniń jeke quramynan 46 adam 5 tehnıka, 8 motopompa jáne 2 úrlemeli qaıyqpen kómekke keldi, olar aldymen Oral qalasy jáne Bórli aýdanyndaǵy sý tasqyny zardaptaryn joıýǵa tartyldy. Oǵan qosa, 28 naýryz kúni QR Qorǵanys mınıstrliginiń eki tikushaǵymen Qaratóbe aýdanynyń Qorjyn aýylynan 271 turǵyn qaýipsiz jerge kóshirildi.
Sondaı-aq Almatydan QR TJM №28237 áskerı bóliminen jetken 50 sarbaz qıyn ýchaskelerde jumys istep jatyr. Sonymen qatar munyń aldynda Aqtóbege kómekke barǵan Mańǵystaý oblystyq TJD bastyǵynyń orynbasary, polkovnık Nurlybek Aıjaryqov bastaǵan top (52 adam, 5 tehnıka, 8 sý soratyn motopompa) 3 sáýir kúni Batys Qazaqstanǵa kelip, apattyq-qutqarý jumystaryna kirisip ketti.
«Qazgıdromet» RMK BQO fılıalynyń 3 sáýir kúngi saǵat 20.00-degi málimeti boıynsha Jaıyq ózeni Báıterek aýdany ıAnvartsev aýyly tusynda 705 santımetrge (+13, qaýipti shegi – 1250 sm) jetti. Jaıyq ózeni sáýir aıynyń ekinshi jartysynda tasyǵan jaǵdaıda Oral qalasy, Bórli aýdany Dımıtrov, Báıterek aýdany Baıqonys aýyldaryna, jaıylmalarda ornalasqan barlyq saıajaılarǵa qaýip tónedi.
Sol sekildi Shaǵan ózeni Chývashın eldi mekenindegi gıdrobekette keshe sý deńgeıi 1 928 santımetrdi (+11, 1280-1300 sm) kórsetti. Shaǵan ózeni 5-7 sáýir aralyǵynda tasýy múmkin. Onda Báıterek aýdany aýyldary men saıajaı alqaptaryna qıyn tıedi.
Oral qalasy ákimdiginen túsken málimetke qaraǵanda, oblys ortalyǵynda 429 adam evakýatsııalyq pýnktilerde jatyr. Derkól kenti mádenıet úıi men «Oral» sport kesheni lyq tolǵan. Oblystyq olımpıada rezervi mamandandyrylǵan mektep-ınternatyndaǵy pýnkt te tolýǵa jaqyn. Olardyń bári úsh mezgil ystyq tamaqpen, qajetti gıgıenalyq zattarmen qamtamasyz etilgen. Taǵy eki evakopýnkt bar, eger olar da tolsa, taǵy úsheýi jasaqtalady.
Eske sala keteıik, budan buryn BQO-da Jaıyq ózeniniń deńgeıi 850 santımetrge jetýi yqtımaldyǵyn jazǵan bolatynbyz.
