BQO-da sý aıdyndarynda qaýipsizdik talaptaryn buzǵandarǵa 4 mln-ǵa jýyq teńge aıyppul salyndy
ORAL. KAZINFORM — Batys Qazaqstan oblysynda shomylý maýsymy kezinde 6 adam sýǵa ketse, sonyń tórteýi – balalar.
BQO TJ departamenti bastyǵynyń orynbasary Nuraly Músıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde úsheýi Jańaqala aýdanynda tirkeldi. Sonymen qatar Syrym, Báıterek jáne Bórli aýdanynda bir-bir adamnan sýǵa ketken.
Onyń sózine qaraǵanda, ótken jyly atalmysh merzimde 7 adam osyndaı qazaǵa ushyrasa, sonyń bireýi bala edi. Bul bıyl jasóspirimderdiń sýǵa ketýi kóbeıip otyrǵanyn kórsetedi.
- Jyl basynan beri sý aıdyndarynda qaýipsizdik talaptaryn saqtamaǵany úshin 253 tulǵa 3 mln 893 myń 844,3 teńge kóleminde ákimshilik jaýapkershilikke tartyldy. Sonyń tórteýi zańdy tulǵa bolsa, qalǵan 249-y – jeke adamdar. Toltyrylǵan hattamalardyń 59-y Oral qalasy, 29-y Aqjaıyq, 28-i Terekti, 27-si Báıterek aýdanynyń úlesine tıedi, - dedi N.Músıev.
Departament málimeti boıynsha oblysta 34 jaǵajaı bolsa, sonyń 24-iniń ótinimi qaralyp, 17-sine jumys isteýine ruqsat berildi.
Sý aıdyndaryndaǵy qaýipsizdik qaǵıdalarynyń talaptaryna sáıkes kelmeýine baılanysty 6 kommýnaldyq, 1 jeke menshik jaǵajaıǵa ruqsat berilmedi. Al 10 jaǵajaı boıynsha tekserýge ótinim kelip túspegen.
- Sýdaǵy qaýipsizdikti qamtamasyz etý jáne oqýshylardyń júzý daǵdylaryn qalyptastyrý maqsatynda oblysta 5 jabyq basseın jáne 34 modýldik karkasty basseın jumys isteıdi, - dep qosty departament bastyǵynyń orynbasary.
Eske sala keteıik, budan buryn Batys Qazaqstanda úsh jasóspirimniń sýǵa ketip qalǵanyn jazǵan edik.
