BQO-da stalkıng jasaǵan er adamǵa aıyppul salyndy

ORAL. KAZINFORM – Batys Qazaqstan oblysynda Bórli aýdandyq soty Qylmystyq kodekstiń 115-1-babynda kózdelgen zańsyz qýdalaý deregi boıynsha úkim shyǵardy.

BQO sotynyń baspasóz qyzmetinen málim etkenindeı, sottalýshy D. óz áreketteriniń zańsyz ekenin bile tura, jábirlenýshi E-ge 2025 jylǵy 20 qyrkúıekten 2026 jylǵy 23 qańtarǵa deıingi aralyqta júıeli túrde zańsyz qýdalaý jasaǵan. 

Atap aıtqanda, birneshe ret telefon soǵyp, habarlamalar jibergen, sonyń ishinde qorqytý sıpatyndaǵy habarlamalar joldaǵan. Jábirlenýshiniń turǵylyqty jáne jumys ornyna baryp, sol jerlerde ańdyp kútken.

2026 jylǵy 23 qańtarda sottalýshy mas kúıinde dúkennen shyqqan jábirlenýshini ańdyp, onyń erkinen tys qolynan ustap, qardyń ústine qulatqan. Sol sátte áriptesteri kómek kórsetip, sottalýshyny qýyp jibergen.

Qylmystyq isti qaraý barysynda sottalýshy kinásin tolyq moıyndady. Prokýror sottalýshyǵa 80 saǵat qoǵamdyq jumys taǵaıyndaýdy surady, al jábirlenýshi jazany sottyń qalaýyna qaldyrdy.

Er adamnyń áreketteri jábirlenýshige eleýli zııan keltirgen zańsyz qýdalaý retinde saralandy.

- Sot sottalýshynyń áreketteri uzaq ýaqytqa sozylǵanyn, Qazaqstan Respýblıkasy Konstıtýtsııasymen kepildik berilgen jeke adamnyń negizgi bostandyqtaryna qol suqqanyn atap ótip, is boıynsha jınalǵan dáleldemelerdiń jıyntyǵy negizinde ony kináli dep tanydy.

Nátıjesinde sottalýshy D-ǵa 80 aılyq eseptik kórsetkish mólsherinde, ıaǵnı 346 myń teńge kóleminde aıyppul túrindegi jaza taǵaıyndaldy. Sot úkimi zańdy kúshine engen joq, - dep habarlady vedomstvodan. 

Eske sala keteıik, budan buryn Batys Qazaqstanda stalkıng jasaǵan 2 adamnyń sottalǵanyn jazǵan edik.