BQO-da statsıonarda jatqan naýqastardyń 98 paıyzdan astamy – vaktsına almaǵan

ORAL. QazAqparat – Batys Qazaqstan oblysynda ınfektsııalyq statsıonarlarda jatqandardyń 98 paıyzdan astamy – vaktsına almaǵandar, dep habarlaıdy QazAqparat tilshisi.

BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, qazirgi tańda 1710 naýqas ambýlatorlyq em alýda. Sonyń 79 paıyzynda aýrý jeńil ótýde. 8 paıyzynyń jaǵdaıy ortasha. 13 paıyzy – sımptomy joqtar.

Onyń sózine qaraǵanda, sońǵy táýlikte oblystyq jedel járdem stansasyna barlyǵy 895 qońyraý shalynsa, sonyń 112-si kovıdke baılanysty boldy. 38 naýqas statsıonarǵa jatqyzyldy.

Kúni búgin óńirde 1459 tósektik 20 ınfektsııalyq statsıonarda 646 adam emdelýde. Aýrýhanalar 44,2 paıyzǵa tolǵan. Sonyń ishinde 109 tósektik jansaqtaý bólimshesinde 42 naýqas (38,5 paıyz) jatyr. Bulardyń 38-i aýyr, tórteýi asa aýyr halde.

Invazıvti jasandy tynys alý apparatyna 4, ınvazıvti emes osyndaı qurylǵyǵa 12, ottegi kontsentratoryna 26 naýqas qosylǵan.

Infektsııalyq statsıonarlarda jatqandardyń deni egilmegenderdiń bolýy vaktsınalaýdyń mańyzdylyǵyn kórsetedi.

Oblys boıynsha 189 872 adam vaktsınanyń birinshi, 147 967-si ekinshi komponentimen egildi.

«16 jáne 19 tamyz aralyǵynda oblysqa qytaılyq Sinopharm farmokologııalyq kompanııasynyń 30 myń doza (17500-i – І, 12500-i – ІІ komponent) Vero Cell vaktsınasy jetkizildi. Buǵan qosa taǵy 5 myń doza qytaılyq vaktsına (ІІ komponenti) ákelinbek. Kúni búginge deıin bul vaktsınanyń birinshi komponentin 1064 turǵyn alyp úlgerdi. Bul –Dúnıejúzilik densaýlyq saqtaý uıymymen qaýipsiz ári tıimdi dep tanylǵan alǵashqy qytaılyq preparat, búginde álemniń 45 elinde atalǵan vaktsınamen eresek turǵyndardy egýge ruqsat etilgen. Qazirgi tańda bul vaktsına Qytaıdan bólek Birikken Arab Ámirlikteri men Serbııada óndiriledi. Sonymen qatar Qytaı men BAÁ qytaılyq Sinopharm farmokologııalyq kompanııasynyń belsendiligi joıylǵan vaktsınasyn 3-17 jas aralyǵyndaǵy balalarǵa shuǵyl egýdi qoldady», - dedi A.Qalıbekov.

Pandemııa bastalǵannan beri oblysta tirkelgen 33 719 naýqastyń 25 809-y (76,5 paıyzy) jazylyp shyqty. Solardyń ishinde 12 213-i statsıonarlyq, 13 596-sy ambýlatorlyq em aldy. 641 adam indetten kóz jumdy.

Eske sala keteıik, budan buryn BQO-da tamyz aıynda 2 500-den astam adamnyń koronavırýs juqtyrǵanyn jazǵan bolatynbyz.