BQO-da sotpen aqtalǵan turǵyn 3 mln teńge óndirip aldy
ORAL. KAZINFORM — Oral qalasynyń № 2 sotynda turǵynnyń talap qoıýy boıynsha azamattyq is qaraldy.
BQO sotynyń baspasóz qyzmetinen málim etkenindeı, atalǵan turǵyn Qarjy mınıstrligi men BQO polıtsııa departamentin moraldyq zııandy óteý jáne qylmystyq jaýaptylyqqa zańsyz tartylǵany úshin barlyq vedomstvolyq saıttarda jarııalaý arqyly resmı jazbasha keshirim suraýǵa mindetteýdi suraǵan.
Sot K-nyń áreketterinde qylmys quramynyń bolmaýyna baılanysty kinásiz dep tanylyp, aqtalǵanyn jáne sot zalynda qamaýdan bosatylǵanyn anyqtady.
Sondaı-aq qylmystyq jaýaptylyqqa zańsyz tartylýy saldarynan keltirilgen zalaldy óteýge quqyǵyn tanydy. Batys Qazaqstan oblystyq sotynyń qylmystyq ister jónindegi sot alqasynyń qaýlysymen K-ǵa qatysty úkim ózgerissiz qaldyrylǵan.
Sot talap qoıýshynyń ózine keltirilgen moraldyq azaptyń aýyrlyǵyna bergen sýbektıvti baǵasyn da, ony rastaıtyn obektıvti derekterdi de eskere otyryp, ádildik, parasattylyq jáne jetkiliktilik ólshem sharttaryna súıene kele, moraldyq zııandy óteý mólsherin 3 mln teńge dep belgiledi.
Talap qoıýshy sot úkimi negizinde aqtalǵan. Osyǵan baılanysty sot zań normalaryn sózbe-sóz túsindirý negizinde polıtsııa departamentin resmı jazbasha keshirim suraýǵa mindetteý týraly talapty qanaǵattandyrýǵa jatpaıdy dep eseptedi.
— Anyqtalǵan mán-jaılardy eskere otyryp, sot K-nyń talap qoıýyn ishinara qanaǵattandyrdy, jaýapkerden 3 mln teńge mólsherinde moraldyq zııandy óteý somasyn óndirip aldy. Al K-nyń talaptarynyń qalǵan bóligin qanaǵattandyrýdan bas tartyldy. Sheshim zańdy kúshine engen joq, — dep habarlady vedomstvodan.
Eske sala keteıik, budan buryn Oralda aýrýhanada balaǵat sóz aıtyp, dárigerge tıisken áıelge aıyppul salynǵanyn jazǵan edik.
