BQO-da sot turǵynnyń 1,2 mln teńge jalaqy qaryzyn óndirip berdi

ORAL. QazAqparat  - Batys Qazaqstan oblysynda sot turǵynnyń 1,2 mln astam teńge jalaqy qaryzyn óndirip berdi, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, Zelenov aýdandyq sotyna áıel adam 1 201 833 teńge eńbekaqy qaryzyn óndirý talabymen júgingen.

Sot otyrysynda turǵyn «G» JShS-ynda 2012 jyldan 2017 jylǵa deıin esepshi bolyp jumys jasaǵanyn jetkizdi. Alaıda 2016 jyly seriktestik oǵan jalaqysyn tólemegen. Soǵan qaramastan, esepshi 2017 jylǵa deıin jumysyn jalǵastyra berdi.

Sotqa kýáger retinde shaqyrylǵan «G» JShS quryltaıshylarynyń biri A. degen azamat talapkerdiń ýájimen tolyq kelisti.

Sot is qujattaryn zertteı kele, talap-aryzdy tolyq kólemde qanaǵattandyrdy.

Sot sheshimi zańdy kúshine engen joq.