BQO-da sońǵy úsh jylda tirkelgen mal urlyǵy 2,5 myńnan asty
ORAL. QazAqparat - Batys Qazaqstan oblysynda sońǵy úsh jylda tirkelgen mal urlyǵy deregi 2,5 myńnan asty. Bul týraly Ortalyq kommýnıkatsııalar qyzmeti óńirlik fılıalynda ótkizilgen baspasóz máslıhatynda málim etildi.
BQO ishki ister departamenti jergilikti polıtsııa qyzmeti bastyǵynyń orynbasary Kenjebek Quspaevtyń aıtýynsha, bıyl jyl basynan beri óńirde 4 712 urlyq tirkelse, sonyń 324-i nemese 3,8 paıyzy - mal urlyǵy. Barlyǵy 908 bas mal urlansa, sonyń 575-i nemese 63,3 paıyzy tabylyp, ıelerine qaıtaryldy. Jeti aıdyń qorytyndysy boıynsha atalǵan qylmystyń 46,5 paıyzy ashylǵan. Maldyń 79,9 paıyzy erkin jaıylymnan qoldy bolǵan. Bul maldyń baǵýsyz júretindigin kórsetedi. Sonyń saldarynan mal shekara asyp, Reseı jerine de ketip qalyp jatady. Mysaly, tamyz aıynyń basynda Jánibek aýdany Jaqsybaı aýyldyq okrýginen 28 bas sıyr shekara asqan, sonyń úsheýi ǵana tabyldy. Qaztalov aýdanynda 9 jylqy shekara asqanmen, bári de ıelerine qaıtaryldy.
BQO prokýratýrasy bóliminiń aǵa prokýrory Temirlan Abdyqulovtyń sózine qaraǵanda, sońǵy úsh jylda mal urlyǵy 2,5 myńnan assa, urlanǵan mal sany 4 757-ge jetken. Munyń basty sebepteri - mal esebiniń durys júrgizilmeýi, ıeleriniń qamsyzdyǵynan maldyń bos júrýi, maldy qalaı bolsa solaı soıý, urlyqtyń aldyn alý baǵytynda memlekettik organdar sharalarynyń jetkiliksizdigi. Osyndaı olqylyqtardy joıý, et ónimderine maldárigerlik baqylaýdy qamtamasyz etý baǵytynda óńirde «Mal urlyǵyna qarsy jol kartasy» birlesken is-qımyl jobasy júzege asyrylýda.
