BQO-da sońǵy úsh jylda elektr jelilerinde 510 apattyq jaǵdaı boldy

BQO energetıka jáne turǵyn úı-kommýnaldyq sharýashylyq basqarmasynyń basshysy Mırjan Nurtazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 2020 jyly – 284, 2021 jyly – 202, bıyl 24 apat tirkelgen.
Osyǵan baılanysty oblysta aldaǵy úsh jylda elektr jelileri men jabdyqtaryn qaıta qurýǵa 20 mlrd teńge qarastyrylyp otyr.
Mırjan Nurtazıevtiń aıtýynsha, bul joba QR Úkimetiniń qaýlysymen bekitilgen oblystyń keshendi damý jospary aıasynda júzege aspaqshy.
Onyń sózine qaraǵanda, osy maqsatqa 2023 jyly – 6 mlrd, 2024 jyly – 7 mlrd, 2025 jyly 7 mlrd teńge jumsalmaq.
Qazirgi kezde óńirde elektr jelileri men qosalqy stantsııalardyń 82 paıyzy tozsa, atalǵan jospar júzege asqan jaǵdaıda 62 paıyzǵa deıin tómendeıdi.
Kúni búgin 97 mln-ǵa jýyq teńgege 12 jobalyq-smetalyq qujattama jasalýda.
«Sonymen qatar jóndeý jumystary «Batys Qazaqstan aımaqtyq elektr jelilik kompanııasy» JShS-nyń óz qarajaty esebinen jyl saıyn júrgiziledi. Bıyl osy maqsatqa 707,2 mln teńge bólinip, tıisti jumystar atqaryldy. Sondaı-aq bıyl atalǵan seriktestik úshin 437,1 mln teńgege tótenshe jaǵdaı jelisi arqyly túrli tehnıka satyp alýǵa bıýdjettik ótinim joldandy», dedi Mırjan Nurtazıev.
Eske sala keteıik, budan buryn «Jaıyqjylýqýat» AQ-nyń jylý qubyrlary 50,7 paıyzǵa tozǵanyn jazǵan bolatynbyz.